תלמידי וחסידי סאטמאר קוקן זיך צו מיט פרייד צו די הרחבת גבולי הקדושה, ווען אין די יעצטיגע טעג איז אריין אין קראפט א העפטיגע בוי פראיעקט אויפצובויען די ערשטע בנין הישיבה אין די נייע קרית הישיבות ד'סאטמאר אין קרית יואל, א ריזן שטח אויף די פראספעקט גאס אין בלומינגראוו געגנט אין קרית יואל.
מיט בלויז עטליכע וואכן צוריק האט די הנהלת הישיבה קטנה געשלאסן מקח אויף דעם גיגאנטישן שטח וואס נעמט אריין 11 אקער לאנד, מען האט גלייך אריינגעגעבן א ביטע פאר בוי פערמיטן, און אצינד האט מען שוין באקומען די פערמיט אויפצובויען די ערשטע צוויי בניני הישיבה אויפן פלאץ.
אנהייב וואך פרשת כי תצא האט מען אין א מזל'דיגע שעה אנגעהויבן די פאקטישע בוי ארבעט ביים ערשטן בנין הישיבה, און די בוי ארבעט ביים צווייטן בנין איז ערווארטעט זיך אנצוהייבן קומענדיגן ווינטער הבעל"ט, עס וועט נאכפאלגן מיט נאך בנינים פאר אלע סניפים פון די ישיבות קטנות, א סך הכל פון אכט בנינים וואס וועט ברענגען גרויס הרחבת הדעת פאר די חשובע תלמידים פון אלע סניפי הישיבות קטנות פון די סאטמארע מוסדות אין קרית יואל.
די מאסיווע פראיעקט ווערט פערזענליך באגלייט דורכ'ן נשיא המוסדות כ"ק אדמו"ר מסאטמאר שליט"א, תחת דגלו והדרכתו פון בנו הגדול הגה"צ ר' חיים צבי טייטלבוים שליט"א אבד"ק סאטמאר ירושלים וועלכער שטייט בראש פון די קהילה און מוסדות אין קרית יואל.
