שמחת בית מודזיץ: עס איז געשלאסן געווארן די שידוך פון א אייניקל ביי כ"ק אדמו"ר ממודזיץ שליט"א, די חתן א זון פון זיין איידעם הגה"צ ר' יוסף שיף שליט"א, זון פון כ"ק אדמו"ר מליזענסק זצ"ל פון ירושלים, מיט די כלה א טאכטער פון הרב שלום ענגלענדער שליט"א, זון פון הרב פנחס נפתלי ענגלענדער שליט"א, זון פון הנגיד החסיד ר' אלי'ש ענגלענדער שליט"א, און איידעם ביי הגה"צ אבד"ק זוועהיל ב"ב שליט"א.
היינט קומט פאר די שמחות הברית מילה פון צוויי אייניקלעך ביי כ"ק אדמו"ר מפאפא שליט"א, בן הנולד ביים רבינ'ס זון הגה"צ ר' משה גרינוואלד שליט"א, איידעם ביי כ"ק אדמו"ר מספינקא שליט"א, און בן הנולד ביי הרב יחזקאל לויפער שליט"א, זון פון הגה"צ ר' יוסף לויפער שליט"א, איידעם ביי כ"ק אדמו"ר מקיוויאשד שליט"א, און איידעם ביים רבינ'ס זון הגה"צ ר' מאיר גרינוואלד שליט"א דומ"ץ פאפא. – די שמחות קומען פאר אין ביהמ"ד הגדול פאפא אין וויליאמסבורג.
היינט קומט פאר די מעמד הכנסת ספר תורה וואס ווערט אריינגעגעבן צום וויזניצע בית המדרש אויף רחוב אדוניהו הכהן אין ירושלים עיה"ק, נדבת הנגיד החסיד ר' חיים סימקאוויטש הי"ו, לע"נ חותנו הרה"ח ר' מענדיל מארגענשטערן ע"ה, אין שפיץ פון כ"ק אדמו"ר מוויזניץ שליט"א פון ירושלים.
היינט קומט פאר א גרויסע מעמד רחמים שאלי פאר כלל חסידי סאטמאר בארה"ק, לאור קריאת הקודש פון כ"ק אדמו"ר מסאטמאר שליט"א און די רבני הקהילה צו מעורר זיין רחמי שמים לישועת הכלל והפרט, די מעמד קומט פאר אינעם גרויסן היכל אין קרית ויואל משה אין ירושלים עיה"ק.
היינט קומט פאר די מעמד חתמנו לחיים טובים פאר כלל חסידי דעעש בארה"ק, סיום הלכות שבת אין משנה ברורה וואס איז געלערנט געווארן אין ראם פון עמוד היומי דחסידי דעעש, עס קומט פאר אין היכל מירון בוטיק אין אתרא קדישא מירון, אין שפיץ פון כ"ק אדמו"ר מדעעש שליט"א, נאכגעפאלגט מיט א מעמד ההדלקה לכבוד התנא הרשב"י אין שפיץ פונעם רבי'ן.
כ"ק אדמו"ר מלעלוב שליט"א וועט היינט דאנערשטאג ארויספארן צום הר הזיתים בראש קהל חסידיו, און פוקד זיין דעם ציון הק' פון אביו כ"ק אדמו"ר מלעלוב זצ"ל, לקראת די הילולא קדישא וואס געפאלט אויס בעצם יום הקדוש.
כ"ק אדמו"ר מקרעטשניף י"ם שליט"א וועט היינט אנקומען אויף א תפילת רבים אין אתרא קדישא מירון בראש קהל חסידיו, לרגל די ימי הרחמים והרצון. שפעטער פארנאכטס וועט דער רבי אנקומען אויף אמירת תשליך ביים כנרת טייך, און דערנאך דאווענען מעריב ביים ציון הק' פון התנא רבי מאיר בעל הנס אין טבריה.
כ"ק הגה"צ גאב"ד מאקאווא שליט"א וועט היינט אנקומען צום ציון הק' פון רבי אבדימי דמן חיפה, וואו דער רב שליט"א וועט אויסזאגן גאנץ ספר תהלים אינאיינעם מיט פילע חסידים, נאך תשליך וועט דער רב אנקומען אויף תפילת מעריב אין מערת אליהו אין חיפה.
כ"ק אדמו"ר מבית יצחק ספינקא שליט"א קומט היינט אן קיין לעיקוואד, אויפצונעמען די חסידים לקראת די הייליגע טעג הממשמשים ובאים, אין שטוב פון הרב החסיד ר' מרדכי פארגעס הי"ו.
כ"ק אדמו"ר מבלאזוב ריבאטיטש שליט"א וועט היינט אנקומען קיין לעיקוואד אויפצונעמען די חסידים לרגל די ימי הרחמים והרצון, אין שטוב פון הרה"ח ר' מאיר בערטראם הי"ו, נאך מעריב וועט דער רבי שליט"א אויפטרעטן מיט א שמועס התעוררות לקראת יום הקדוש.
פילע אדמורי"ם ורבנים וועלן היינט ארויסגיין אויף אמירת תשליך, כנהוג בחצרות הקודש צו זאגן תשליך אינעם יום הקריאה בעפאר יום הקדוש.
אריינצושיקן מודעות און נייעס, שיקט אן אימעיל צו NEWS@JDNMAIL.COM
