א שווערע פארלוסט האט באטראפן די באבובער קהילה און גאנץ כלל ישראל, מיט די פטירה בשיבה טובה פון הרב החסיד הישיש ר' שלום באכנער ע"ה, מזקני חסידי באבוב, און פון די לעצט פארבליבענע תלמידים פון הרה"ק בעל קדושת ציון מבאבוב זי"ע, אין טיפן עלטער פון הונדערט און איין יאר.
וואויל זענען די אויגן וואס האבן געזעהן, איז געזאגט געווארן אויף הרב החסיד ר' שלום, וועמענס פאטער הרב החסיד ר' איילוש באכנער ז"ל מחשובי חסידי צאנז און באבוב, האט נאך זוכה געווען צו זעהן דעם הייליגן צאנזער רב הרה"ק בעל דברי חיים זי"ע. דער נפטר ר' שלום האט נאך געלייגט תפילין ביים הייליגן קדושת ציון זי"ע, און געהאט די זכיה זיך מסתופף צו זיין ביי פילע צדיקים וקדושים אין דער אלטער היים, צווישן זיי עטליכע קינדער פון הרה"ק מצאנז זי"ע.
ר' שלום האט איבערגעלאזט א דור ישרים יבורך, איינער פון זיינע קינדער איז דער בארימטער עסקן און נשיא ומייסד פון "בוני עולם", הרב החסיד המפואר ר' שלמה באכנער הי"ו.
הונדערטער אידן האבן באגלייט ר' שלום אויף זיין לעצטן וועג, ביי די לוויה וואס איז פארגעקומען נעכטן זונטאג פארנט פון ביהמ"ד הגדול באבוב אין בארא פארק, און ער איז געקומען לקבורה אויפן באבובער בית החיים אין ניו דזשערזי.
