דעם ענדע וואך פרשת חיי שרה, וועט כ"ק אדמו"ר מוויזניץ שליט"א פון לאנדאן מופיע זיין בשערי ארה"ב אויף א לענגערע באזוך פון צוויי וואכן, צו באשיינען די שמחת החתונה פון א אייניקל, די חתן א זון פון זיין זון הגה"צ ר' לוי יצחק האגער שליט"א, איידעם ביי זיין פעטער הגה"צ אבד"ק ראחמיסטריווקא מאנסי שליט"א, מיט די כלה א טאכטער פונעם רבינ'ס פלומעניק הגה"צ ר' חיים מאיר האגער שליט"א, זון פון כ"ק הרה"צ בעל אור שלום מוויזניץ זצ"ל, און איידעם ביי הגה"צ אבד"ק אוהעל מאנסי שליט"א.
דער רבי שליט"א איז ערווארטעט צו לאנדן אין ניו יארק קומענדיגן דאנערשטאג הבעל"ט, און וועט זיך אויפהאלטן אין שטאט מאנסי די מערהייט פון די ימי הביקור, בבית האכסניא ביי הנגיד החסיד ר' יעקב יהושע פיש הי"ו. דער רבי שליט"א וועט פראווענען צוויי שבתים אין מאנסי, אינאיינעם מיט אחיו הגדול כ"ק אדמו"ר מוויזניץ שליט"א פון מאנסי אין גרויסן וויזניצע בית המדרש, סיי די שבת אויפרוף קומענדיגן שבת פרשת חיי שרה, און סיי די שבת שבע ברכות שבת פרשת תולדות.
דינסטאג פרשת תולדות וועט פארקומען די שמחת החתונה אין ביהמ"ד הגדול וויזניץ אין מאנסי, צומארגנס מיטוואך וועט דער רבי שליט"א אריינפארן קיין בארא פארק אויפצונעמען דעם ציבור חסידים, און צו באשיינען די שמחת החתונה במעון הקודש פון זיין שווער כ"ק אדמו"ר מקאלוב שליט"א, די כלה א טאכטער ביים רבינ'ס שוואגער כ"ק אדמו"ר ממאשלוי שליט"א.
זונטאג פרשת ויצא וועט דער רבי אנקומען קיין וויליאמסבורג אויפצונעמען דעם ציבור חסידים, און צו באשיינען די שמחת השבע ברכות במעונו וואס וועט פארקומען בצל הקודש פונעם גרויסן זיידן כ"ק אדמו"ר מקאלוב שליט"א. דינסטאג פרשת ויצא וועט דער רבי באשיינען די שמחת החתונה פון א אייניקל ביים פלומעניק כ"ק אדמו"ר מוויזניץ שליט"א פון בארא פארק, און תיכף דערנאך ארויספארן אויפן וועג אהיים למעון קדשו אין לאנדאן.
