מיט ווייניגער ווי פיר און צוואנציג שעה פארבליבן צום גרויסן און היסטארישן מעמד הנחת אבני הפינה דורך מוסדות מונקאטש מאנסי, שטייגט די התרגשות גאר שטארק ביי די הונדערטער תלמידים וחסידים און הורי המוסדות, וואס גרייטן זיך מיטצוהאלטן דעם היסטארישן מאמענט ווען עס וועט געלייגט ווערן די יסודות פאר צוויי נייע בנינים אדירים לתורה ולתפילה.
ווי באריכטעט פארלאפענע וואך גרייט מען זיך אויפצובויען צוויי שפאגל נייע בנינים פון מוסדות מונקאטש אין מאנסי, א נייע בנין פאר די ישיבה יודעי בינה מונקאטש, און א נייע בנין פאר די תלמוד תורה תפארת בנים מונקאטש, אין די צייט וואס ביז יעצט זענען ביידע מוסדות איינקוואטירט אין צייטווייליגע געדונגענע בנינים, און עס פעלט זיך אויס גאר שטארק א אייגענע אכסניא צו קענען מרחיב זיין די גבולי הקדושה.
אין די לעצטע פאר טעג זענען די געטרייע חברי ההנהלה אריין אל הקודש פנימה צו פילע גדולי אדמורי"ם און רבנים אינעם עיר התורה והחסידות מאנסי, איינצולאדענען די חשובע רבני העיר צו באשיינען דעם גרויסן מעמד להרחיב גבולי הקדושה. אזוי אויך זעהט זיך שוין אן העפטיגע צוגרייטונגען אויפן שטח הבניה פון די ישיבה אויף קעמפבעל עוועניו אין עירמאונט, וואו די גרויסע מעמד הנחת אבני הפינה וועט פארקומען מארגן זונטאג אין די פריע נאכמיטאג שעות, במעמד קהל רב און רבני העיר, ובראשם כ"ק אדמו"ר ממונקאטש שליט"א נשיא המוסדות.
