א טרויער האט זיך היינט אראפגעלאזט אויף די גאסן אין בני ברק, מיטן אנקום פון די שווערע בשורה איבער די פטירה פון הגאון הגדול רבי יעקב ישראל פאזען זצ"ל, לאנגיעריגער דיין און מורה הוראה אין שטאט, און פון די גרעסטע פוסקים אין ארץ ישראל אויפן הייליגן וועג פון הרה"ק דער חזון איש זי"ע.
ער איז געווען א זון פון הגאון ר' אליעזר פאזען זצ"ל דיין אין שטאט לאנדאן, וועלכער איז געווען א ברודער מיט הגה"ק משאפראן זי"ע בעל תורת אלף, אין זיינע יונגע יארן האט ער זוכה געווען צו מקבל געווען אסאך תורה ביים הייליגן חזון איש זי"ע, און אלע יארן איז ער געזעסן בין כותלי בית המדרש און געהארעוועט אין לערנען אין די בארימטע כולל חזון איש.
ר' יעקב ישראל איז געווען פון די שטארק אנגענומענע דיינים אין ארץ ישראל, און גע'פסק'נט דיני תורה בבית דינו פון הגאון האדיר רבי ניסים קארעליץ זצ"ל. היינט מאנטאג איז ער נפטר געווארן אין טיפן עלטער פון ניינציג יאר, און טויזענטער אידן זענען ארויסגעקומען אפצוגעבן דעם כבוד האחרון, ביי די לוויה וואס איז ארויס פון די בארימטע לעדערמאן שוהל אויף רחוב רשב"ם, אויפן וועג צום פאנאוויטשער בית החיים.
