די שטאט בארא פארק איז אין די לעצטערע טעג היבש איינגעהילט אין פלאמען, נאך וואס עטליכע פייערן האבן אויסגעבראכן אין די געגנט צוליב פארשידענע זאכן, ווען אין די לעצטע פיר און צוואנציג שעה איז באריכטעט געווארן ווייניגסטנס פיר ערנסטע פייערן וואס האט פאראורזאכט ערנסטע שאדן.
נעכטן אנהייב נאכט האט אויסגעבראכן א פייער ביי די צענטע עוועניו און די איין און פערציגסטע סטריט, די פייער האט זיך אנגעהויבן ווען אומלעגאלע פייערקרעקערס האט אויפגעריסן, און א דערנעבענדיגע קאר איז אויפגעגאנגען אין פלאמען צו איר אייביגע רוה.
געציילטע שעה שפעטער ארום צוועלף אזייגער ביינאכט, האט פאסירט א העלישע פייער אין א באוואוינטע געביידע אויף די פערציגסטע סטריט, די פייער האט זיך אנגעהויבן אויף די דריטע שטאק, און אלע איינוואוינער זענען ארויסגעראטעוועט געווארן באצייטנס. די פייער האט געבוזשעוועט א לענגערע צייט ביז די פייערלעשער האבן באוויזן איבערצוקומען די פלאמען.
און ווידער האט פאסירט א פייער היינט פארמיטאג, דאסמאל אויף א שולע באס, וואס איז מינוטן בעפאר געווען פול מיט קינדער. די באס איז געפארן אויף די דריי און צוואנציגסטע עוועניו נישט ווייט פון בארא פארק, און דער דרייווער האט אויפגעכאפט אז עפעס איז נישט אין ארדענונג, ער האט שנעל עוועקואירט אלע קינדער און אויסגעליידיגט די באס, מינוטן איידער די מאטאר האט אויפגעריסן אין פלאמען און פארשווארצט די גאנצע פאדערשטע טייל פון די באס.
היינט נאכמיטאג האט פאסירט א פערטע פייער אינצידענט, ווען א דרייער אין א באוואוינטע דירה אויף זעכצן ביי ניין און פופציג האט אנגעהויבן ברענען, בחסדי השם איז נישט באריכטעט געווארן קיין ערנסטע שאדן.
נאכפאלגענדיג די מערערע אינצידענטן, ווען א טייל דערפון האט פאסירט צוליב אומלעגאלע פייערקרעקערס, האבן די ניו יארק סיטי פאליציי זיך אראפגעלאזט היינט נאכמיטאג אויף א געשעפט ביי די אכטע עוועניו אין בארא פארק, וואו עס ווערט אומלעגאל פארקויפט די סחורה, די פאליציי האט געעפנט א אויספארשונג און קאנספיקירט א גרויס טייל פון די סחורה.
