די עולם החסידות איז איינגעהילט אין טרויער מיטן ערהאלטן די שווערע בשורה פון די מאונט סיני שפיטאל אין מאנהעטן, אז עס איז נפטר געווארן הרבנית הצדיקת מסקווירא ע"ה, אשת חבר יבדל לחיים טובים ארוכים כ"ק אדמו"ר מסקווירא שליט"א, בלויז געציילטע טעג נאך איר איין און אכציגסטער יום הולדת פארלאפענע וואך ד' אדר.
די רעבעצין הרבנית חיה חנה טווערסקי ע"ה, איז געווען די עלטסטע טאכטער פון כ"ק אדמו"ר הרה"ק בעל ישועות משה מוויזניץ זי"ע, א אייניקל פון פריערדיגע צדיקים וקדושים לבית וויזניץ, טשערנאביל, צאנז דעעש, ראפשיץ, ולמעלה בקודש.
ביום חמשה עשר באב תשי"ט איז זי אריינגעקומען בברית הנישואין אין קרית ויזניץ בני ברק, מיט איר גרויסן מאן להבחל"ח כ"ק אדמו"ר מסקווירא שליט"א, איינציגסטער זון פון כ"ק אדמו"ר הרה"ק מסקווירא זי"ע, אינאיינעם האבן זיי אויפגעשטעלט א הערליכע דור בקרתא דשופריא אין שיכון סקווירא, וואו בלויז עטליכע יאר דערויף איז זי נתעלה געווארן בכסא המלוכה, ווען איר חשובער מאן דער רבי שליט"א האט איבערגענומען דעם כתר האדמורו"ת.
אלע יארן איז די רעבעצין געשטאנען מיט א מורא'דיגע געטריישאפט פאר די המשכת המלוכה, געהאלפן די תושבי השיכון און באגלייט די חסידים מיט א ווארעמע הארץ, ווען אין שפיץ זעט זיך אן אירע געוואלדיגע פעולות פארן גרויסן מאן דער סקווירא רבי שליט"א ער זאל קענען אנגיין מיט די עבודת הקודש און משפיע זיין פאר די חסידים פון נאנט און ווייט.
די לעצטערע יארן איז די רעבעצין ליידער נישט געווען געזונט, און מיט צוויי וואכן צוריק איז זי אריינגעפירט געווארן אין שפיטאל אין א שווערע געזונט צושטאנד, אין די צייט וואס כלל ישראל איבער די גאנצע וועלט האט מתפלל געווען לרפואתה.
יעצט נאכמיטאג ארום פיר אזייגער איז די רעבעצין נפטר געווארן בשיבה טובה לחיי העולם הבא, מיט די אנוועזנהייט פון די קינדער און אייניקלעך וואס האבן געזאגט פסוקי יחוד, און אצינד גרייט מען זיך אויף די גרויסע לוויה וואס וועט פארקומען פארנט פון ביהמ"ד הגדול אין שיכון סקווירא אכט אזייגער אויפדערנאכט.
די רעבעצין ע"ה לאזט איבער איר גרויסן מאן דער רבי שליט"א, א הערליכע דור ישרים יבורך, פיר זיהן הרה"צ ר' אהרן מענדיל, הרה"צ ר' יצחק, הרה"צ ר' יעקב יוסף, און הרה"צ ר' חיים מאיר, דריי טעכטער, הרבנית מזוועהיל ארה"ב, הרבנית מראחמיסטריווקא מאנסי, און הרבנית אשת הרה"צ ר' יעקב יוסף האגער בן כ"ק אדמו"ר מוויזניץ שליט"א פון מאנסי. אויך לאזט זי איבער די צוויי ברידער כ"ק מרנן האדמורי"ם מוויזניץ שליט"א פון ארץ הקודש, די שוועסטער הרבנית מבעלזא תליט"א, די שוועסטער הרבנית מסאטמאר תליט"א, און די שוועסטער הרבנית אשת הרה"צ ר' מנחם ארנסטר שליט"א ראש ישיבת וויזניץ.
תהא נשמתה צרורה בצרור החיים.
