די ווענט פון בארא פארק צענטער זענען אייביג גרייט פאר נאך א פייערונג און אינטערעסאנטע פראגראם וואס ווערט צוגעשטעלט פאר די איינוואוינער
דעם פאריגע וואך, האבן די איינוואוינער אינאיינעם מסיים געווען דעם ערשטן מסכת אין ש"ס מסכת ברכות, וואס איז געלערנט געווארן אין די ראמען פון עמוד יומי, און כדאי צו אפגעבן דעם ריכטיגן כבוד התורה, איז געפראוועט געווארן א פייערליכע סיום אינעם בית המדרש פונעם צענטער
מען האט געקענט טאפן די פייערליכקייט אין די לופטן ווען די איינוואוינער זענען אריינגעקומען אינעם בית המדרש וואו די טישן זענען געווען הערליך געדעקט ווי עס פאסט פאר אזא גרויסארטיגע געשעעניש, און דער רב פונעם צענטער הרב אהרן ווייספעלד שליט"א האט געמאכט דעם סיום צו די פרייד פון אלע איינווואוינער
זינט די עמוד יומי פראגראם האט זיך אנגעהויבן, האט הרב ווייספעלד שליט"א אנגעהויבן גאר א געשמאקע טעגליכע שיעור אינערהאלב די בארא פארק צענטער, מיט די באטייליגונג פון פילע מענטשן אויך פון אינדרויסן פונעם בארא פארק צענטער, וועלכע האבן הנאה געהאט צו געניסן פונעם געשמאקן שיעור, און פילע באטייליגטע געבן איבער אז דער שיעור איז פארוואנדלט געווארן ביי זיי אלס דער סאמע הויכפונקט פונעם טאג.
דער שיעור איז בלויז איינס פון די פילצאליגע פארשידנארטיגע געשמאקע פראגראמען וואס ווערן צוגעשטעלט דורך די פארוואלטונג פון בארא פארק צענטער, וועלכע שפארט נישט קיין צייט און מי צו פארזיכערן אז די איינוואוינער האבן א געשמאקע צייט און אז זייער טאג איז אנגעפולט מיט הנאה און צופרידנהייט.
דער הערליכער סיום מסכת ברכות האט זיך געשלאסן מיט דעם וואס די איינוואוינער האבן אינאיינעם אנגעהויבן צו לערנען מסכת שבת, בשעת וואס זייער ליפן שעפשען א תפילה אז אין זכות פון זייער סיום אויף מסכת ברכות, זאלן זיי קענען ענדיגן נאך פילע מסכת מיט די זעלבע געשמאק און הנאה אין א געזונטער עלטער.
