א שרעקליכע פייער האט אויסגעבראכן היינט פארטאגס אין בארא פארק, אין שטוב פון הגה"צ אבד"ק סטאבניץ שליט"א, העכער די סטאבניצע ביהמ"ד אויף 60'טע סטריט, די פייער האט זיך אנגעהויבן אינעם רב'ס דירה, און האט זיך פארשפרייט אינעם גאנצן בנין, אריינגערעכנט נאך א דירה דערנעבן, געציילטע שעות נאך וואס דער רב שליט"א איז אהיימגעקומען פון די חתונה פון א קינד.
פינף זענען ליידער פארוואונדעט געווארן אין די שריפה, ווען זיי האבן נישט געהאט קיין וועג ארויס איידער די פייערלעשער זענען אנגעקומען, דער רב שליט"א מיט זיין זון זענען קריטיש פארוואונדעט געווארן, און געפונען זיך אין די קארנעל שפיטאל אויף באהאנדלונגען, בעת וואס כלל ישראל איז מתפלל לרפואתם, הגה"צ ר' ברוך אברהם בן העסא, און הב' יהודה צבי בן אסתר שרה.
נאך דריי זענען שווער פארוואונדעט געווארן, אבער געפונען זיך ב"ה אין א סטאבילע צושטאנד, אנוועזנדע אידן זענען שנעל אריינגעלאפן אין ביהמ"ד און ארויסגעראטעוועט די ספרי תורה, און פייערלעשער האבן שווער געארבעט אראפצוקלאפן די העלישע פלאמען.
