מיט שווערע געפילן האבן הונדערטער חסידי סאטמאר היינט באגלייט למנוחת עולמים, הרב החסיד ר' משה הערש רייזמאן ע"ה פון די גאר חשובע חסידים און עסקנים, און לאנגיעריגער גבאי און איש אמונו פון הרה"ק בעל ברך משה מסאטמאר זי"ע.
ר' משה הערש איז געווען א זון פון הרב החסיד ר' יודא רייזמאן ע"ה, און א איידעם ביי הרב החסיד ר' מאיר שטיין ע"ה. ער איז געווען דער סאמע ערשטע הויז בחור צו משמש זיין ביי הרה"ק בעל ברך משה מסאטמאר זי"ע, תיכף ווען ער איז אויפגענומען געווארן אלס רבי אין סאטמאר אין יאר תש"מ. אלע יארן אויך נאך די חתונה איז ער צוגעשטאנען מיט א מורא'דיגע געטריישאפט, און שטענדיג צוגעלייגט א האנט ארויסצוהעלפן די שטוב ווירטשאפט ביים רבי'ן.
ער האט פארמאגט א גאלדענע הארץ און ליבליכקייט צו יעדן איד, תלמידי וחסידי סאטמאר געדענקן זיין הארציגע שמייכל אין יעדע געלעגנהייט, זייענדיג פון די מערסט באקאנטע מענטשן אין גרויסן סאטמארע ביהמ"ד אויף ראדני סטריט. די לעצטע שטיק צייט איז ער ליידער זייער נישט געזונט געווען, און היינט פארטאגס איז ער נפטר געווארן לחיי העולם הבא, אין בליענדן עלטער פון דריי און זעכציג יאר.
די לוויה איז פארגעקומען היינט צופרי פארנט פון ביהמ"ד הגדול דקהל יטב לב ד'סאטמאר אין וויליאמסבורג, צוליב חודש ניסן האט מען נישט מספיד געווען, אבער עס האט זיך אנגעזעהן א ציבור עצום וואס זענען געקומען באגלייטן דעם חשובן נפטר למנוחת עולמים, אין שפיץ פון כ"ק אדמו"ר מסאטמאר שליט"א.
