מיט פארקלעמטע הערצער און פארביטערטע געמיטער, האבן פילע חסידי ספינקא יעצט נאכמיטאג אין ארץ ישראל באגלייט למנוחת עולמים, אחר מיטתה פון האשה החשובה הרבנית חנה פעשא דייטש ע"ה, יונגסטע טאכטער פון כ"ק אדמו"ר מספינקא שליט"א פון ב"ב, און אשת חבר הרה"ג ר' דוד דייטש שליט"א בן הרה"ג גאב"ד רמת שלמה שליט"א, וועלכער איז היינט צופרי פלוצלינג נפטר געווארן אין עלטער פון 30 יאר.
די שוידערליכע טראגעדיע האט אויפגעשאקלט כלל חסידי ספינקא ברחבי תבל און הונדערטער ידידים ומכירים, ווען די שווערע בשורה האט זיך פארשפרייט היינט צופרי אז דעם רבינ'ס טאכטער איז ליידער נישט אויפגעשטאנען, איבערלאזנדיג א שטוב מיט קינדערלעך אינדערהיים, ווען די עלטסטע איז בלויז אכט יאר.
הונדערטער אידן האבן אנטייל גענומען ביי די מסע הלוויה וואס איז פארגעקומען צוויי אזייגער נאכמיטאג בהיכל ביהמ"ד ספינקא אויף רחוב דונולו אין בני ברק, אין שפיץ פון פילע אדמורי"ם, רבנים, וראשי ישיבות, בראשם דער פאטער כ"ק אדמו"ר מספינקא שליט"א וועלכער האט ליידער געדארפט באגלייטן א קינד למנוחות, איר חשובער מאן הרה"ג ר' דוד דייטש שליט"א, און זיין פאטער הרה"ג ר' מתתיהו דייטש שליט"א גאב"ד רמת שלמה, די פעטערס כ"ק האחים האדמורי"ם מביאלא פשיסחא, לעלוב ירושלים, און גארליץ שליט"א, האדמורי"ם ממאחנובקא בעלזא, דאראג, ספינקא ב"ב, ספינקא רמת אהרן, ביאלא בני ברק, זידטשויב פתח תקוה, אב"ד מאקאווא אשדוד, אב"ד מאקאווא ב"ב, אב"ד צאנז טשאקאווא, און נאך חשובע אידן רבנן ותלמידיהון.
כ"ק אדמו"ר מספינקא שליט"א האט אויפגעטרעטן מיט דברי הספד בקול בוכים, דערנאך האט אויפגעטרעטן מיט דברי הספד מחותנו הגה"צ גאב"ד רמת שלמה שליט"א, און נאך עטליכע בני המשפחה. דערנאך האבן די קינדער געזאגט קדיש, און דער ציבור האט ארויסבאגלייט די מיטה לרחובה של עיר.
פון בני ברק איז די לוויה ארויסגעפארן קיין פתח תקוה, וואו די חשובע נפטרת איז געקומען לקבורה אויף די סגולה בית החיים, נעבן אירע גרויסע זיידעס לבית ספינקא זי"ע.
ויהי רצון שלא ישמע עוד שוד ושבר בגבולינו, אך בשורות טובות.
