א וואלקן פון טרויער האט זיך אראפגעלאזט אויף די חסידישע וועלט און חסידי ביאלא בפרט, מיט די הסתלקות לשמי מרום פונעם זקן האדמורי"ם כ"ק אדמו"ר מביאלא, הרה"ק רבי בצלאל שמחה מנחם בנציון ראבינאוויטש זצוק"ל, שריד לדור דעה וממעתיקי השמועה, וועלכער איז היינט צופרי נסתלק געווארן לגנזי מרומים אין עלטער פון ניין און אכציג יאר.
די שרעקליכע אבידה און יתמות וואס האט באטראפן חסידי ביאלא איז אומבאשרייבליך, טויזענטער אידן שטייען און וויינען על סילוקו של צדיק, על האי שופרא דבלי בארעא, דער געטרייער מנהיג רעיא מהימנא וואס איז געווען ווי א ליבליכער טאטע פאר די חסידים די לעצטע העכער פערציג יאר כולן שוין לטובה.
ח' אדר א' תרצ"ה איז דער רבי זצ"ל געבוירן געווארן אלס יונגסטע זון צו זיין גרויסן פאטער כ"ק אדמו"ר הרה"ק בעל חלקת יהושע מביאלא זי"ע, זייענדיג אן אייניקל בן אחר בן צו די הייליגע צדיקים לבית ביאלא און פשיסחא, ביז ארויף צום הייליגן יו"ד הקדוש פון פשיסחא זי"ע.
אין זיינע יונגע יארן איז ער אויפגעוואקסן אין שטאט ביאלא, און אלס קליין קינד האט ער מיטגעמאכט גאר שווערע צייטן דורכאויס די צווייטע וועלט מלחמה, ביז ער איז אין א מזל'דיגע שעה אנגעקומען קיין ארץ ישראל אין די טראנספארט פון "ילדי טעהראן". דער רבי האט געלערנט אלס בחור אין די בארימטע פאנאוויטשע ישיבה און געשטיגן העכער און העכער אויפן תורה לייטער, זייענדיג מושלם בתורה והוראה, אויסגעקאכט אויף א קלארע פארנעם בד' חלקי שולחן ערוך, באגלייט מיט א רייכע מחשבה און בינה יתירה אויף יעדן טריט און שריט.
תשי"ז האט דער רבי חתונה געהאט מיט זיין חשובע רעבעצין ע"ה, א טאכטער פון הגה"צ ר' אברהם משה באב"ד זצ"ל אבד"ק סונדערלאנד, אן איידעם ביי הגה"צ ר' ישראל ארי' מרגליות זצ"ל אדמו"ר מפרעמישלאן לאנדאן. דער רבי האט אוועקגעשטעלט א געהויבענע תורה'דיגע שטוב אין שטאט געיטסהעד אין ענגלאנד, און שפעטער האט ער זיך געצויגן קיין ארץ ישראל פאר א קורצע תקופה.
תשל"ט איז דער רבי זצ"ל געווארן אויפגענומען אלס רב ואב"ד פון די חרדי'שע קהילה אין שטאט לוגאנו אין שווייץ, יארן לאנג איז דער רבי געשטאנען על המשמר אויף אלע רוחניות'דיגע און גשמיות'דיגע אקטיוויטעטן אינערהאלב די שטאט, און געווען א געטרייער מנהיג פאר אלע תושבי העיר.
תשמ"ב נאכן הסתלקות פונעם פאטער הרה"ק בעל חלקת יהושע זצ"ל, איז דער רבי זצ"ל געווארן אויפגענומען אלס ביאלא רבי און ממלא מקום, טראץ וואס ער איז געווען די יונגסטע קינד, זייענדיג מלא וגדוש בתורה וחסידות, א אויסגערופענער רב און פוסק בכל חדרי התורה.
דורכאויס די יארן איז דער רבי געשטאנען אין שפיץ פון קהילות ומוסדות ביאלא ברחבי תבל, געבויעט בנינים לתורה ולתפילה, און באגלייט יעדן חסיד פערזענליך מיט א פאטערליכע ליבשאפט. דער רבי איז געווען באקאנט מיט זיין קלארקייט אינעם עולם החינוך, און אסאך אויפגעטון צו ראטעווען אידישע קינדער זיי נענטער צו ברענגען צום בורא כל עולמים.
די לעצטע תקופה איז דער רבי ליידער נישט געווען געזונט, איבערהויפט אין די לעצטע צוויי וואכן ווען דער רבי איז געווען אין שפיטאל אין א שווערע געזונט צושטאנד. היינט צופרי איז דער רבי נתבקש געווארן לישיבה של מעלה, איבערלאזנדיג קהל עדת חסידיו ערשיטערט און צושאסן, אבידה היא שאין לה תמורה, וכל בית ישראל יבכו את השריפה אשר שרף השם.
שווערע טויזענטער אידן זענען אצינד פארזאמלט ברחובה של עיר ירושלים תובב"א, אפצוגעבן דעם כבוד האחרון פארן שריד לדור דעה, בדרכו האחרונה צום הר הזיתים בעיר ה' שמה.
דער רבי זצ"ל לאזט איבער א הערליכע דור, גאר חשובע קינדער און איידימער, אייניקלעך און אור אייניקלעך בליעה"ר. זיין זון הגה"צ ר' חיים יודא לייבוש שליט"א אב"ד שערי תורה מאנטשעסטער, זיין זון הגה"צ ר' דוד מאניש ראבינאוויטש שליט"א, זיין זון הגה"צ ר' יוסף ראבינאוויטש שליט"א ראש ישיבת ביאלא, און זיין זון הגה"צ ר' אברהם משה ראבינאוויטש שליט"א רב חסידי ביאלא אין מעלה עמוס. די איידימער זענען הגה"צ ר' אברהם יצחק ווייס שליט"א ראש כולל ביאלא, און הגה"צ ר' מרדכי וויינבערג שליט"א רב חסידי סלאנים אין לאנדאן.
זכר צדיק לברכה לחיי העולם הבא.
