פון חצר הקודש באיאן איז ערב שבת קודש געמאלדן געווארן די ענדגילטיגע פלענער, אז די צענטראלע הדלקה פון כ"ק אדמו"ר מבאיאן שליט"א בליל ל"ג בעומר, וועט דאס יאר פארקומען בקרתא דשופריא אין ירושלים עיר הקודש, און שפעטער וועט דער רבי ארויספארן קיין מירון אנצונדן די מדורה אויף א באגרעניצטע פארנעם.
דאס קומט נאכדעם וואס די מדינת ישראל רעגירונג האט ענדגילטיג ארויסגעגעבן זייער באשלוס נעכטן דאנערשטאג, אז זיי וועלן נישט ערלויבן סיי וועלכע מעמדי הדלקה און גרויסע צוזאמקומען ביום ל"ג בעומר אין אתרא קדישא מירון, אין ליכט פון די אנגעצויגענע מלחמה צושטאנד אין צפון ארץ ישראל.
כ"ק אדמו"ר מבאיאן שליט"א וועלכער האלט אן די חזקה פון דורי דורות אנצוצינדן די צענטראלע הדלקה אויפן דאך פון די מערה יעדעס יאר, בהיכנס היום הקדוש ל"ג בעומר, האט אויסגעדרוקט רצון קדשו נישט צו פארוואסערן דעם געהויבענעם מעמד נישט קענענדיג גיין קיין מירון, נאר אנשטאט וועט דער רבי פראווענען א גרויסע מעמד הדלקה בעיר הקודש ירושלים, בהתאסף כל קהל הקודש אינאיינעם, שוין פון פאר שבת פרשת בהר ווען די חסידים פון אלע שטעט וועלן קומען צו פארן מיטהאלטן דעם שבת ערב ל"ג בעומר בצל הקודש.
תיכף מוצאי שבת וועט פארקומען די גרויסע מעמד הדלקה אין ירושלים, און דערנאך וועט דער רבי ארויספארן קיין אתרא קדישא מירון, און אנצינדן די הדלקה אויפן דאך פון די מערה, מיט די באטייליגונג פון א ענגע צאל מקורבים, לויט די אנווייזונגען פון די באאמטע. זונטאג אינדערפרי וועט פארקומען די מעמדי החאלאקעס אין ביהמ"ד הגדול באיאן אין ירושלים.
