התעוררות'דיגע לופט הערשט איבער די גאנצע עיר ואם בישראל בארא פארק, ווען די צענדליגע טויזענטער איינוואוינער זענען איינגעהילט אין א תפילה'דיגע שטימונג, זיך גרייטענדיג צו א צענטראלע יום תפילה מארגן ערב ראש חודש סיון, על פי קריאת הקודש פון די גדולי אדמור"י ורבני העיר.
די ימי עצרת תפילה ווערט פאררופן אין ליכט פון די שווערע מצב וואס הערשט אויף די היימישע אידנטום אין בארא פארק, הונדערטער אידן געפונען זיך ליידער על ערש דוי נאכן באטראפן ווערן מיט שווערע מחלות, און איבער אלעם איז פארהאן א רייע גדולי האדמורי"ם אין שטאט וואס זענען ליידער נישט געזונט, און זענען אנגעוויזן אויף רחמי שמים.
צווישן די חולי ישראל בעיר ואם בישראל בארא פארק, איז כ"ק אדמו"ר מקאסוב שליט"א וועלכער איז זייער נישט געזונט ל"ע, דער רבי איז א יוצא ונכנס אין שפיטאל מיט גאר שווערע קאמפליקאציעס, און בלויז תפילות ישראל קען העלפן ארויסצונעמען דעם רבי'ן פון דעם שווערן מצב. אזוי אויך כ"ק אדמו"ר מסקולען שליט"א וועלכער איז ליידער אין א שוואכע געזונט צושטאנד שוין לענגערע חדשים, און כ"ק אדמו"ר מסערדאהעלי שליט"א וועלכער געפונט זיך אצינד אין שפיטאל.
אויפן גוטהייסונג פון די גדולי האדמורי"ם והרבנים, איז באשטימט געווארן אויף מארגן דאנערשטאג ערב ראש חודש אלס א צענטראלע יום תפילה פאר די גאנצע שטאט, אזוי אויך פאר די נאכפאלגענדע טעג ביום ראש חודש, יום המיוחס, און די שלושת ימי הגבלה, ווען עס וועלן פארקומען מערערע מניני תפילה אין אלע בתי מדרשים לענגאויס די שטאט, צו איינרייסן וועלטן און פועל'ן א ישועה שלימה פאר די וואוילזיין פון די תושבי העיר.
