פון ארץ ישראל איז היינט אנגעקומען שווערע נייעס, איבער די פטירה בשיבה טובה פון הגאון הגדול רבי אברהם פאללאק זצ"ל לאנגיעריגער משגיח אין ישיבת סלאבאדקע אין בני ברק, וועלכער איז געווען פאררעכנט אלס דער זקן המשגיחים בדורינו, זייענדיג אין טיפן עלטער פון פיר און ניינציג יאר.
דער גאון ר' אברהם האט פאר א לעכטיגע תקופה פון נאנט צו זיבעציג יאר נאכאנאנד געדינט אלס משגיח אין סלאבאדקע, און דורכאויס די אלע יארן משפיע געווען תורה ויראה פאר תלמידים, דברי מוסר והדרכה און לעגענדארע שמועסן אין עניני עבודת השם. היינט נאכמיטאג איז דער ראש ישיבה נסתלק געווארן אין די מעייני הישועה שפיטאל אין בני ברק לדאבון לב אלפי תלמידיו ותלמידי תלמידיו, איבערלאזנדיג א דור ישרים יבורך בליעה"ר.
