פילע אידן באוויינען די שווערע אבידה בסילוקו של צדיק, כ"ק אדמו"ר מזידטשויב שיקאגא הרה"ק רבי יהושע העשיל אייכענשטיין זצ"ל, וועלכער איז נסתלק געווארן לגנזי מרומים נעכטן זונטאג נאכמיטאג אין עלטער פון 81 יאר, איבערלאזנדיג א הערליכע דור פון חשובע קינדער און אייניקלעך בנין וחתנין רבנן.
די מסע הלוויה האט זיך אנגעהויבן נעכטן זיבן אזייגער פארנאכטס בהיכל בית מדרשו קהל חסד לאברהם זידטשויב אויף וועסט דעוואן אין שיקאגא, עס האבן אויפגעטרעטן מיט דברי הספד בנו הגדול הגה"צ רבי פנחס שלום אייכענשטיין שליט"א אב"ד חודרוב שיקאגא, און בנו הצעיר הגה"צ ר' זלמן לייב אייכענשטיין שליט"א רב ואב"ד אין די קהילה.
דערנאך איז די מיטה געפירט געווארן מיט א פליגער קיין ניו יארק, אנקומענדיג צו די טיטערבארא לופטפעלד נאך חצות הלילה איז מען געפארן קיין שיכון סקווירא, וואו ארום האלב נאך צוויי באישון ליל איז כ"ק אדמו"ר מסקווירא שליט"א ארויסגעקומען באגלייטן די מיטה פונעם זידטשויבער רבי זצ"ל מיט וועם דער סקווירא רבי איז דריי מאל א מחותן, אזוי אויך איז דארט געווען אנוועזנד כ"ק אדמו"ר מוויזניץ שליט"א פון מאנסי, א דאפלטער מחותן מיטן זידטשויבער רבי'ן זצ"ל.
דערנאך האט מען אפגעראכטן די טהרה אין די סקווירא טהרה שטיבל, און היינט צופרי איז פארגעקומען די מסע הלוויה אין ביהמ"ד זידטשויב אין מארין פארק, וואס שטייט בנשיאות בנו הגה"צ ר' יחזקאל אייכענשטיין שליט"א אב"ד זידטשויב. עס האט מספיד געווען זיין ערשטע קאזין ידידו ורעו כ"ק אדמו"ר מקאסאן שליט"א, כ"ק אדמו"ר מלויעוו טשערנאביל פארשעי שליט"א א שוואגער, הגה"צ אבד"ק קנין תורה שטראסבורג שליט"א א שוואגער, בנו הגה"צ אב"ד זידטשויב מארין פארק שליט"א, און זיין איידעם הגה"צ ר' שלמה פרענקל שליט"א אב"ד וויעליפאלי לעיקוואד.
פון דארט איז די מיטה געפירט געווארן צום קענעדי לופטפעלד אונטערוועגנס קיין ארץ ישראל, ארום זיבן אזייגער צופרי איז די פליגער ערווארטעט צו לאנדן אין די לוד לופטפעלד, און ניין דרייסיג אינדערפרי וועט פארקומען די גרויסע מסע הלוויה אין ביהמ"ד הגדול דחסידי באיאן אין ירושלים, אין שפיץ פון כ"ק אדמו"ר מבאיאן שליט"א א מחותן מיטן זידטשויבער רבי'ן זצ"ל, ואתו עמו נאך פילע אדמורי"ם ורבנים וקרובי המשפחה, און הונדערטער חסידים ואנשי מעשה.
