א אייגענארטיגע אסיפת הרבנים איז פארגעקומען אין מאנסי פארגאנגענע וואך, וואו צענדליגע רבנים זענען זיך צוזאמגעקומען צו דן זיין בכובד ראש איבער די לעצטיגע שערוריות אנבאלאנגט דאס כשרות פון ספרי תורה, די אסיפה איז פאררופן געווארן דורך וועד משמרת סת"ם, און איז אפגעהאלטן געווארן אין ראחמיסטריווקא בית המדרש אין מאנסי.
ביים אסיפה האבן זיך באטייליגט מערערע אדמור"י ורבני עיר מאנסי, כ"ק האדמורי"ם מסטאניסלאוו, ראחמיסטריווקא ס"וו, זידטשויב פרעמיסלא, אסטראוו קאלושין, אב"ד ראחמיסטריווקא, אב"ד סאטמאר, אב"ד פאפא, אב"ד באבוב 45, אב"ד קהל אברכים, אב"ד נייטרא, אב"ד פרעמישלאן, אב"ד סלאנים,אב"ד תפארת יעקב, דומ"ץ שיכון סקווירא, דומ"ץ בעלזא, דומ"ץ סאטמאר, דומ"ץ באבוב, דומ"ץ וויען, דומ"ץ צאנז, דומ"ץ צאנז קלויזענבורג, דומ"ץ זוועהיל, דומ"ץ וויזניץ, דייני סקווירא, הרה"ג ר' יעקב יוסף האגער בן כ"ק אדמו"ר מוויזניץ, הרה"ג ר' חיים פלאהר ראה"כ זכרון מנחם, און הרה"ג ר' משה קעסלער ראה"כ וויזניץ.
אויך האט זיך אנגעזעהן די השתתפות פון עטליכע רבנים מחוץ לעיר, כ"ק אדמו"ר מקאסאני בית שמש שליט"א אשר ידיו רב לו בעסק הסת"ם, הרה"ג ר' ישראל שנעעבאלג שליט"א אב"ד טשערנאוויץ ב"פ, און הרה"ג ר' יואל יצחק שטערן שליט"א דומ"ץ דינוב קרית יואל, חברי וועד משמרת הסת"ם.
ביים אסיפה איז אויפגעברענגט געווארן איינס פון די הויפט פראבלעמען, נאך וואס אסאך ספרי תורה גייען נישט אדורך געהעריג קיין בדיקת גברא און מ'פארלאזט זיך אויפ'ן בדיקת קאמפיוטער וואס איז נישט אלעמאל קראנט. אויך איבער די שטארקע פראבלעם אז אסאך ספרים זענען געשריבן געווארן דורך סופרים וואס האבן גענוצט דעם 'תיקון הורוביץ' אלס הילף געצייג צו באגלייטן זייער כתיבה, וואס האט זיך ארויסגעשטעלט צו האבן אסאך פסולים, און די בתי דינים און ארץ ישראל זענען שוין ארויסגעקומען איבער דעם.
עס זענען געהערט געווארן דרשות פון הרה"ג רבי ישראל שנעעבאלג שליט"א אב"ד טשערנאוויץ ב"פ אליינס א סופר מומחה און דיין בעניני סת"ם, כ"ק אדמו"ר מקאסאני בית שמש שליט"א, הרה"ג רבי אברהם הערש וואזנער שליט"א אב"ד סאטמאר מאנסי און דער רב פון וועד משמרת סת"ם בארה"ב, הרה"ג רבי משה קעסלער שליט"א ראה"כ וויזניץ ומרבני הוועד, און הרה"ג רבי יצחק שפיטצער שליט"א מדייני שיכון סקווירא ומרבני הוועד.
ביים אסיפה איז באשלאסן געווארן אוועקצושטעלן א פאראייניגטע "פיקוח ספרי תורה דקהילות הקודש" וואס וועט זיין אונטערן אויפזיכט פונעם וועד משמרת סת"ם וואס הגר"ש וואזנער זצ"ל בעל שבט הלוי האט אוועקגעשטעלט אין ארץ ישראל און אין אמעריקע. די רבנים ודיינים האפן אז מיט'ן כח הרבים וועט מען זיך בעז"ה קענען אן עצה געבן מיט דעם וואקסנדן ספרי תורות פראבלעם, וואס איז היינט צוטאגס א ריזיגע מסחר און האנדל מארקעט אין ארץ ישראל און אין אויסלאנד, אבער עס פעלט איבערזיכט.
