מיט צער און טרויער ווערט אויפגענומען די ביטערע בשורה איבער די פטירה פון הרבנית הצדיקת מליסקא, מרת מלכה פריעדלאנדער ע"ה, אשת חבר כ"ק אדמו"ר מליסקא שליט"א, וועלכער איז היינט צופרי נפטר געווארן אין עלטער פון 77 יאר, נאכן ליידן א הארץ אטאקע נעכטן נאכמיטאג.
די רעבעצין ע"ה איז געווען א טאכטער פון הרב החסיד ר' יעקב יצחק שטערנבערג ז"ל פון ירושלים, און פאר לאנגע יארן געשטאנען לימין הקודש פון איר חשובער מאן כ"ק אדמו"ר מליסקא שליט"א, אנצופירן די עדה הקדושה און ממשיך זיין די שלשלת הקודש לבית ליסקא וואס ציהט א המשכה צו פריערדיגע צדיקים וקדושים.
נעכטן נאכמיטאג זייענדיג אין שפיטאל פאר א רוטינע אונטערזוכונג, האט די רעבעצין פלוצלינג געליטן פון א הארץ אטאקע רח"ל, און טראץ אלע פרואוון איר צו האלטן ביים לעבן, איז זי היינט צופרי נפטר געווארן לחיי העולם הבא, איבערלאזנדיג איר חשובער מאן דער רבי שליט"א, קינדער און אייניקלעך א דור ישרים יבורך.
די לוויה וועט פארקומען היינט מיטאג איינס אזייגער ביי ביהמ"ד ליסקא אויף די פופציגסטע סטריט אין בארא פארק, אויפן וועג צום בית החיים הר שלום אין מאנסי.
