לעצטע הכנות ווערן געמאכט אין די טעג אין בעפארברייטונג צו די היסטארישע מעמד הנחת אבן הפינה וואס וועט פארקומען זונטאג פרשת עקב י"ד אב, ווען עס וועט געלייגט ווערן די גרונדשטיין פאר א נייע יונגל קעמפ אינערהאלב מחנה אהל יוחנן ראחמיסטריווקא, סטאנציאנירט אין גרינפיעלד פארק ניו יארק, בשכינות צו וואודרידזש און עלענוויל, אין צענטער פון די היימישע קעמפס און קאנטריס וואו צענדליגע טויזענטער אידן וויילן אצינד אין לויף פון די זוממער וואכן.
די היסטאריע און באדייט פון דעם מעמד איז גאר גרויס, זייענדיג א היסטארישע אונטערנעמונג אינערהאלב די מעכטיגע אימפעריע פון מוסדות התורה וואס פיגורירן לשם ולתפארת לענגאויס די קעטסקילס בערג, ווען א פרישע פראיעקט ווערט אהערגעשטעלט, א שפאגל נייע קעמפ וואס ווערט אויפגעבויעט מן המסד ועד הטפחות, א שריט וואס איז גאר זעלטן אין די קעטסקילס היסטאריע, ווען כמעט אלע אידישע קעמפס זענען געווארן אפגעקויפט, און נאר צוגעבויעט צו עקזיסטירנדע קעמפס, און דא הייבט מען א מאסיווע פראיעקט פון אלף, נעמענדיג א ליידיגע שטח און מען גייט דארט אויפבויען א ריכטיגע שכונה לבית ישראל, אהליך יעקב משכנותיך ישראל, וואו אידישע קינדער וועלן דינען דעם אויבערשטן בדרך התורה והמסורה.
איבערהויפט זעט זיך אן רגשי קודש ביי כלל חסידי ראחמיסטריווקא איבער די וועלט, ווען עס ווערט נמשך די גבולי הקדושה אויף א דראסטישע פארנעם, א מאסיווע פראיעקט וואס ראחמיסטריווקא האט נאך נישט געזען, און נאכדערצו אז דער אומפארגעסליכער רעיא מהימנא קדישא כ"ק אדמו"ר הרה"ק מראחמיסטריווקא זי"ע האט נאך געוואונטשן מברכותיו הטהורות פאר דעם פראיעקט, ווען מען איז אריין אינעם ערשטן שלב אפצוקויפן די שטח בחיים חיותו פונעם רבי'ן זצ"ל.
די הונדערטער קינדער תלמידי מוסדות ראחמיסטריווקא זענען שוין אין גלות פאר עטליכע יאר, טראץ וואס א גאנץ יאר פארמאגן זיי טאקע א אייגענע בנין אין בארא פארק, אבער אין די זוממער וואכן וויילנדיג אין די קאנטרי בערג, זענען זיי ביז היינט געווען פארוואגלט צווישן פארשידענע אכסניות, און מיטן אויבערשטנס הילף וועט מען שוין קומענדיגע יאר קענען פארברענגען אין א אייגענע אכסניא, צווישן די אייגענע פיר ווענט מיט הרחבת הדעת און שלוות הנפש.
די נייע קעמפ ווערט געבויעט אין גרינפיעלד פארק ניו יארק, וואס געפונט זיך צווישן וואודרידזש און עלענוויל, נעבן די רוט 52 נישט ווייט פון די סאטמארער בחורים קעמפ אין דערילענד, דארט וואו עס איז שוין איינקוואטירט די קעמפ פון מכינה לישיבה ראחמיסטריווקא, און הארט דערנעבן ווערט געבויעט די נייע קעמפ, אויף א ריזן שטח פון זיבן און פערציג עיקער!
די מאסיווע פראיעקט נעמט אריין פאנטאסטישע הוצאות פון דרייסיג מיליאן דאללער! די זכות שם הבנין פון די בית המדרש אין קעמפ איז שוין אפגעקויפט געווארן דורך א חשובער נדבן פאר א מיליאן דאללער, און די זכות שם הבנין פון די חדר אוכל אין קעמפ איז שוין אויך פארקויפט געווארן פאר א מיליאן דאללער. אויסער דעם וועט געבויעט ווערן צענדליגע באנגעלאוס פאר איינגעשטעלטע, א רייע געביידעס פאר די קינדער צו שלאפן, שיעור צימערן און א מקוה, צוויי סווימינג פולס און נאך פארשידענע איינריכטונגען וואס פעלט זיך אויס אין אזא מאסיווע פראיעקט.
דורכאויס די לעצטע צוויי יאר זינט מען איז אריין אין קאנטראקט אפצוקויפן דעם שטח, האבן די עסקנים געארבעט אויף מערערע פראנטן צו שליסן דעם מקח בכי טוב, און אויסצוארבעטן די נויטיגע פערמיטן אויפצובויען שפאגל נייע בנינים. מיט עטליכע חדשים צוריק נאכן ערהאלטן די פערמיטן האט מען זיך גענומען צו די פאקטישע בוי ארבעט, מיטן אנגרייטן דעם באדן אויפצובויען גיגאנטישע סטרוקטורן, און צו די זעלבע צייט איז באשטימט געווארן די זמן החגיגה הגדולה, מעמד הנחת אבן הפינה פון וואס מ'שטייט שוין אצינד געציילטע טעג פריער.
די היסטארישע מעמד הנחת אבן הפינה וועט אויף א זעלטענע פארנעם פארקומען מיט די באטייליגונג פון אלע ראחמיסטריווקא רבי'ס, כ"ק מרנן האדמורי"ם לבית ראחמיסטריווקא שליט"א, ועל צבאם דער נשיא המוסדות כ"ק אדמו"ר מראחמיסטריווקא שליט"א, וועלכער וועט גיסן די אבן הפינה און משמיע זיין דברי ברכה לכבוד די מעמד, אויך וועט מען הערן א פלאמפייערדיגע דרשה פון הגה"צ ר' שלמה רובין שליט"א אבד"ק ציעשנוב קרית יואל, א דרשה דורך הרב הערשיל ראוויצקי שליט"א מנהל ת"ת ראחמיסטריווקא אין לעיקוואד, און העסקן הנמרץ לכל קדשי בית ראחמיסטריווקא הרב משה יהושע קראמער שליט"א יו"ר הנהלת המוסדות.
הרב החסיד ר' משה יהושע קראמער שליט"א וועלכער טראגט אויף זיינע פלייצעס די גאנצע עול פון די מוסדות הקדושים שוין לאנגע יארן, הוא הגבר וועלכער שטייט אין שפיץ פון די מוסדות מיום הווסדה, און כסדר נעמט ער אונטער פרישע פראיעקט להרחיב גבולי הקדושה, און פאר די הרחבת הדעת פון די הונדערטער תלמידי המוסדות והוריהם החשובים, וועט אצינד ביים גרויסן מעמד ארויסגעברענגן די דבר המוסדות, די געוואלדיגע רגשי הלב און שבח והודאה שטייענדיג ביי אזא גרויסן דערגרייכונג, וואס איז נאר צושטאנד געקומען א דאנק זיין מסירת נפש לכל קדשי בית ראחמיסטריווקא.
עס איז ערווארטעט א ריזן שטראם פון אידן פון אלע שיכטן און קרייזן לענגאויס די קאנטרי בערג, איבערהויפט הונדערטער ראחמיסטריווקא חסידים וואס וועלן קומען צו פארן פון אלע שטעט, ווי עס ווערט אויך צוגעשטעלט א פלאטע פון באסעס פון אלע שטעט צו פירן דעם ציבור צום גרויסן מעמד. די עסקנים האבן אויסגעארבעט פונקטליכע דעטאלן מיט די שטאטישע פארוואלטונג און סטעיט פאליציי, וואס וועלן שטייט אויף די וואך איבער די גאסן, צושטעלן פארקינג אויף א ברייטע פארנעם, און פארזיכערן די מאקסימום סוקסעס פונעם גרויסן מעמד.
גדול יהיה כבוד המעמד הזה!
