חסידי בעלזא אין ניו יארק גרייטן זיך מיטצולעבן היינט א געהויבענע מעמד הנחת אבן הפינה, פאר די נייע אפטיילונג אין די יונגל קעמפ מחנה בני בעלזא אין וואודרידזש, וואו עס וועט ווערן אויפגעבויעט א ספעציעלע קרית הישיבות פאר די בעלזא ישיבה קטנה'ס שע"י מוסדות בעלזא אין ניו יארק.
לכבוד די מעמד איז געקומען צו פארן א חשובער גאסט פון ארץ ישראל, הרה"ג ר' אברהם שמואל צבי רוקח שליט"א נכד כ"ק אדמו"ר מבעלזא שליט"א, וועלכער דינט אלס פערזענליכער שליח פון די בעלזא מוסדות אין בארא פארק בקודש פנימה פון כ"ק אדמו"ר מבעלזא שליט"א בכל צעד ושעל, דער חשובער גאסט איז געקומען צו פארן בשליחות הקודש פונעם בעלזא רבי'ן צו באשיינען די מעמד, און האט דעם שבת געפראוועט א געהויבענע שבת התאחדות אין קעמפ, אינאיינעם מיט די הונדערטער בחורי הישיבות דחסידי בעלזא אין ניו יארק.
מיט עטליכע טעג צוריק איז פארגעקומען א באשיידענע מעמד הנחת אבן הפינה בביתו נאוה קודש פון כ"ק אדמו"ר מבעלזא שליט"א, וואו דער רבי האט געגאסן די אבן הפינה אין בעפארברייטונג צום גרויסן מעמד, דער רבי האט באטראכט די גענויע פלענער אינאיינעם מיט די עסקנים און ווארעם געוואונטשן ברכת קדשו לרוב.
די גרויסע מעמד וואס קומט פאר היינט זונטאג פרשת עקב, ווען זיך אנהייבן פינף דרייסיג נאכמיטאג מיט תפילת מנחה, עס וועלן אויפטרעטן דער יושב ראש הרב שמואל יצחק פעפערקארן שליט"א מנהל ישיבה קארלין סטאלין אין לעיקוואד ומחשובי חסידי בעלזא, און עטליכע חברי הנהלת המוסדות דחסידי בעלזא אין בארא פארק. מיטן משא המרכזי וועט אויפטרעטן דער חשובער גאסט הרה"ג ר' אברהם שמואל צבי רוקח שליט"א, וועלכער וועט דערנאך גיסן די אבן הפינה אינאיינעם מיט די דייני הקהילה רבנים ואדמורי"ם.
