א שווערע טראגעדיע האט פאסירט היינט נאכמיטאג אין די בושקיל געגנט אין פענסילוועניע, וואו א חשובער אינגערמאן פון לעיקוואד איז ליידער טראגיש נפטר געווארן רח"ל, נאכן זיך דערטרענקען ביים שיפלען צוזאמען מיט זיין משפחה.
דער אינגערמאן איז געפארן אויף א אויספלוג מיט זיינע קינדערלעך, פארנדיג געשמאק מיט א שיפל אויפן דעלאוועיר ריווער אין פענסילוועניע, אינמיטן די רייזע זענען עטליכע קינדער אריינגעפאלן אין די וואסער, דער טאטע איז שנעל אריינגעשפרינגען אין וואסער און באוויזן ארויפצולייגן אלע קינדערלעך צוריק אויפן שיף, אבער דאן איז ער פארשוועמט געווארן דורך כוואליעס.
א שטיק צייט איז אנגעגאנגען א העפטיגע זוך אקציע צו ראטעווען דעם אינגערמאן, מערערע הילפס אגענטורן זענען ארויסגעפארן פון עטליכע שטעט ארויסצוהעלפן אויפן סצענע, מיטן האפענונג צו טרעפן דעם איד געזונט און שטארק, אבער ליידער האט מען אים געטראפן נאך א שטיק צייט אין א גאר שווערע צושטאנד, און נאכן ארבעטן א שטיק צייט אים צו ראטעווען, איז באשטעטיגט געווארן אז ער איז ליידער נישט בין החיים ה"י.
די רעדע איז פון א חשובער איד אין לעיקוואד, הרב ר' ברוך בער זעמבא ז"ל, וועלכער איז געווען פון די חשובע מרביצי תורה אין ישיבה בית מדרש גבוה ד'לעיקוואד, א ראש חבורה פאר תלמידים, און איז געווען ניין און דרייסיג יאר אלט. ער לאזט איבער א שטוב מיט זיבן קינדערלעך, און ווי דערמאנט זענען א טייל קינדער געווען מיט אים אויפן שיף בשעת די טראגעדיע.
