תלמידי וחסידי סאטמאר ציילן שוין די שעות צום גרויסארטיגן יארצייט טיש היינט אויפדערנאכט, ווען די נייע גרויסע היכל ביהמ"ד היכל אלטר יחזקאל בבנין ביהמ"ד בנין אליהו דחסידי סאטמאר אין קרית יואל, וועט באנייעט ווערן אין א מזל'דיגע שעה, במעמד אלפי ישראל ובראשות כ"ק אדמו"ר מסאטמאר שליט"א.
די מאסיווע בוי ארבעט גייט שוין אן פאר עטליכע וואכן אין פולן שוואונג, ווען די עוסקים במלאכת הקודש אויפצובויען דעם נייעם פליגל ארבעטן נאכאנאנד טאג נאך טאג, צו פארזיכערן אז די נייע היכל ווערט גרייט אין צייט, סיי צום היינטיגן יארצייט טיש, און סיי מיט אלע ארומיגע אנגעלעגנהייטן, די ביהמ"ד זאל שוין זיין פולקאם צוגערישט לקראת די ימים הנוראים הבאים עלינו לטובה.
כ"ק אדמו"ר מסאטמאר שליט"א איז די וואך אנגעקומען אויף א באזוך אינעם נייעם בית המדרש, צו באטראכטן פונדערנאנט די געוואלדיגע פארשריט און די שנעלע בוי ארבעט, די גרויסע יארצייט טיש וועט נאכגעפאלגט ווערן מיט א געהויבענע שבת בצל הקודש, ווען דער רבי שליט"א וועט פראווענען בקרב חסידיו תושבי העיר, און אפרעכטן די תפילות און טישן ברוב עם הדרת מלך אינעם נייעם היכל ביהמ"ד.
מוצאי שבת אלס המשך צו שלש סעודות, וועט פארקומען די גרויסארטיגע חנוכת הבית, מעמד "מכונך והיכלך", וואו מען וועט אינאיינעם לויבן דעם אויבערשטן אויף די הרחבת גבולי הקדושה, אין באגלייטונג פון שירה וזמרה בתופים ובמחולות, דברות קודש מפום ממלל רברבן כ"ק אדמו"ר מסאטמאר שליט"א, דברי ברכה פונעם רב הקהילה הגה"צ אבד"ק סאטמאר ירושלים שליט"א בנו הגדול פון רבי'ן, און די דבר הקהילה דורך איינער פון די חשובע ראשי הקהילה.
טראץ וואס אין א געווענליכע יאר פארבלייבט דער רבי אין קרית יואל עטליכע טעג, אויפצונעמען דעם ציבור לקראת די ימים הנוראים הממשמשים ובאים, איז געמאלדן געווארן פון רבינ'ס שטוב אז היי יאר וועט דער רבי נישט פארבלייבן יעצט אין קרית יואל, נאר צוריקקומען אין עטליכע וואכן ארום, פאר עטליכע טעג אין לויף פון פרשת נצבים וילך, און דעמאלטס געזעגענען דעם ציבור לקראת די הייליגע טעג.
אין די זעלבע צייט גרייט מען זיך אויף א גרויסארטיגע מעמד הנחת אבן הפינה וואס וועט פארקומען דעם פרייטאג פארמיטאג בעצם יומא דהילולא קדישא, ווען עס וועט געלייגט ווערן די גרונדשטיין פאר צוויי נייע בנינים אינערהאלב די ישיבה קאמפלעקס פון די ישיבה קטנה פון קרית יואל, סטאנציאנירט אין ניו ווינדסאר, עטוואס ארויפציר נעבן די סטוארט לופטפעלד אין אפסטעיט ניו יארק.
צוליב דעם וואס די היי יעריגע הילולא געפאלט אין א פרייטאג ערב שבת, און פרייטאג בו ביום קומט פאר די מעמד הנחת אבן הפינה ווי דערמאנט, וועט דער רבי שליט"א ארויפגיין צום ציון הק' בליל ההילולא נאכן עריכת שולחן הטהור אין קרית יואל, באלד נאך חצות הלילה אין באגלייטונג פון די טויזענטער תלמידים און חסידים.
