אין די יעצטיגע טעג איז באשטעטיגט געווארן די גענויע פלענער פון די דריטע מסע הצלה דורך די גדולי הדור בארה"ק, אויפצוטרייבן גרויסע געלטער פארן קרן עולם התורה, אפצוראטעווען די עולם התורה והישיבות אויפן פינאנציעלן פראנט, נאך די שווערע גזירת הגיוס וואס האט דראסטיש געשניטן די קאסעס פון ישיבות און כוללים בארץ הקודש.
די יעצטיגע נסיעה וואס קומט די דריטע אין רייע, נאכפאלגענדיג די געלונגענע נסיעה קיין אמעריקע אין חודש סיון, און די געלונגענע נסיעה קיין לאנדאן אין חודש תמוז, וועט זיין געווידמעט פאר אחינו בני ישראל איינוואוינער אין סאוט אמעריקע, לענגאויס די דריי גרויסע שטעט, מעקסיקא, בראזיל, און פאנאמע.
די גדולי הדור וואס וועלן אנטייל נעמען ביי די דאזיגע נסיעה זענען ווי פאלגענד: הגאון הגדול רבי משה הלל הירש שליט"א ראש ישיבת סלאבאדקע, הגאון המשגיח רבי דן סגל שליט"א, הגאון הגדול רבי יעקב הלל שליט"א ראש ישיבת אהבת שלום, הגאון הגדול רבי אברהם סאלים שליט"א ראש ישיבת מאור התורה, הגאון המקובל רבי שמעון גלאי שליט"א, ואתם עמם וועט זיך באטייליגן הגאון הגדול רבי מלכיאל קאטלער שליט"א ראש ישיבה בית מדרש גבוה ד'לעיקוואד.
קומענדיגע מוצאי שבת וועלן די גדולי הדור זיך ארויסלאזן אין וועג קיין בראזיל, און דערנאך קיין מעקסיקא און פאנאמע, וואו אין יעדן פלאץ וועלן זיי זיך אויפהאלטן פאר איין טאג, און באשיינען רייכע מסיבות און באנקעטן לטובת קרן עולם התורה. עס איז מעגליך אז עס וועלן אויך פארקומען גרויסע מעמדי קבלת פנים גענוי ווי עס איז פארגעקומען אין ניו יארק און לאנדאן, און אויף שבת קודש פרשת כי תצא וועלן די גדולי הדור זיך אומקערן אהיים קיין ארץ ישראל.
אין אנדערע נייעס האט הגאון הגדול רבי דוד כהן שליט"א ראש ישיבת חברון זיך היינט ארויסגעלאזט אויף א באזונדערע נסיעה קיין אמעריקע, צו באשיינען א רייע מסיבות לטובת די קרן עולם התורה. מארגן מיטוואך וועט ער זיך אויפהאלטן אין לעיקוואד, אויף שבת וועט ער וויילן אין מאנסי, זונטאג אין פאסעיק ניו דזשערזי, מאנטאג אין טאראנטא קאנאדע, דינסטאג אין מיאמי פלארידע, און מיטוואך כי תצא וועט ער ווידער אנקומען קיין לעיקוואד, און אויפטרעטן מיט א צענטראלע שיעור אין היכל ישיבת בית מדרש גבוה ד'לעיקוואד.
