דעם שבת פרשת נצבים וילך איז אין א מזל'דיגע שעה באנייעט געווארן די הערליכע בית המדרש דקהל יטב לב ד'סאטמאר אויף סאוט 8 אין וויליאמסבורג, וואס ווערט גערופן מיטן נאמען "לב אהרן", און איז נתנדב געווארן דורך הנגיד הנכבד ר' יקותיאל דוד אהרן ווייס הי"ו.
אין בעפארברייטונג צום גרויסן שבת, איז כ"ק אדמו"ר מסאטמאר שליט"א אנגעקומען אויף א באזוך בין כותלי בית המדרש, זייענדיג צוגאסט אין וויליאמסבורג ביי די וועכנטליכע זמני קבלת קהל דינסטאג אויפדערנאכט, דער רבי האט באוואונדערט די כלילת היופי פון די נייע שוהל, און ווארעם געוואונטשן פאר די עוסקים במלאכת הקודש.
די נייע ביהמ"ד אנטהאלט א ריזן לופטיגע היכל ביהמ"ד מיט שטיבלעך צום דאווענען, א שיינע מקוה און אלע באדערפענישן וואס פעלט זיך אויס פאר א חסידישע צענטער אין די היימישע וויליאמסבורג. עס ווערט געפירט דורכ'ן דיין הקהילה הגה"צ ר' חיים אהרן אונגער שליט"א.
דעם שבת לכבוד די פתיחת בית המדרש, איז הגה"צ אבד"ק סאטמאר וומס"ב שליט"א אנגעקומען אויף תפילת שחרית בין כותלי בית המדרש החדש, און נאכן דאווענען אפגעראכטן א קידושא רבא לרגל המאורע.
