ארץ אל תכסי דמם שרייט זיך ארויס נאך די שרעקליכע טעראר אטאקע וואס האט זיך אפגעשפילט נעכטן מיטוואך אין שטאט חדרה אין ארץ ישראל, ווען א חרדישער אינגערמאן וואס איז קריטיש פארוואונדעט געווארן אין די אטאקע, איז ליידער היינט נפטר געווארן פון די וואונדן, השם ינקום דמו.
די טעראר אטאקע האט זיך אפגעשפילט נעכטן צופרי אין חדרה, ווען א טעראריסט איז ארומגעפארן אויף א מאטאר ביציקל און אנגעהאקט די ביינער פון עטליכע מענטשן, זעקס מענטשן זענען שווער פארוואונדעט געווארן פון די אטאקע, און אויך דער טעראריסט איז פארוואונדעט געווארן.
דער טעראריסט וועלכער איז אידענטיפיצירט געווארן אלס א איינוואוינער אין די אום על פאחום געגנט, איז ארומגעפארן מיט א מעסער און א האק און אטאקירט מענטשן ביי פיר באזונדערע לאקאציעס אין שטאט, ביים פערטן לאקאציע איז ער געווארן אפגעהאלטן דורך ציווילע איינוואוינער, און איין מענטש וואס איז געווען באוואפנט, ער איז געווארן איבערגעגעבן פאר די פאליציי וועלכע האבן אים ארעסטירט מיט וואונדן.
איין אינגערמאן וואס איז שווער פארוואונדעט געווארן, איז האברך החשוב ר' רפאל מרדכי פישהוף ז"ל הי"ד, א חשובער כולל אינגערמאן אין ישיבת כנסת יצחק אין חדרה, א זון פון הרה"ג ר' שרגא פישהוף שליט"א רב ביהמ"ד משכן יחזקאל אין בני ברק, ור"ם בישיבת בית מתתיהו. ווי נאר מען האט געהערט די שווערע נייעס האט מען אפגעשטעלט די לימודים סיי אין ישיבת כנסת יצחק אין חדרה און סיי אין ישיבת בית מתתיהו אין בני ברק, וואו מען האט געזאגט תהלים און איינגעריסן לרפואתו, אזוי אויך איז צוגעלייגט געווארן די נאמען חיים לרפואה.
ליידער איז היינט אנגעקומען די ביטערע בשורה פון שפיטאל אז דער אינגערמאן איז נפטר געווארן רח"ל אינגערהייט, איבערלאזנדיג זעקס קינדערלעך יתומים, די לוויה קומט פאר יעצט נאכמיטאג אין ארץ ישראל ביי ישיבת כנסת יצחק אין חדרה, און דערנאך ביי ביהמ"ד אהבת חסד אין בני ברק, אויפן וועג צום פאנאוויטשער בית החיים.
האברך החשוב ר' רפאל מרדכי ז"ל איז געווען פון די גאר חשובע לומדים אין ישיבת כנסת יצחק, ער איז געזעסן און געהארעוועט מיט גרויס התמדה און געווען מאריות שבחבורה, א איידעלער אינגערמאן מיט גאלדענע מידות, און געווען פאררעכנט צווישן די גאר פרומע ליטווישע קרייזן.
