דעם שבת קודש וועט געפראוועט ווערן די היסטארישע שבת חנוכת הבית פאר די נייע קרית הישיבות אין נייעק, מיט די באטייליגונג פון א ריזן ציבור פון נאנט צו צוויי טויזענט אידן וואס וועלן פראווענען די געהויבענע חגיגה, אין שפיץ פונעם נשיא המוסדות כ"ק אדמו"ר מוויזניץ שליט"א פון מאנסי.
ווי באקאנט האט די וויזניצע מוסדות אין מאנסי אפגעקויפט א ריזן שטח אין נייעק מיט עטליכע יאר צוריק, אוועקצושטעלן א ריכטיגע אכסניא פאר די ישיבות הקדושות אמרי חיים וויזניץ, די ישיבה גדולה און ישיבה גבוה פאר די עלטערע בחורים, דריי באזונדערע ישיבה קטנה'ס און נאך עטליכע ישיבות פון אנדערע קרייזן וואס דינגען ארויס בנינים פאר זייער געברויך.
מאמענטאל זענען שוין רוב ישיבות איינקוואטירט אינעם גיגאנטישן קאמפלעקס אין נייעק, אויסער איין אפטיילונג פון די ישיבה קטנה וואס געפונט זיך אין קרית קאשוי אין בעדפארד היללס, און נאך לענגערע בוי ארבעט און רענאוואציעס איז שוין באנייעט געווארן א פרעכטיגע בנין "בית נחום" פאר די ישיבה גדולה, און א הערליכע בנין "בנין חיים מאירים" פאר די ישיבה קטנה ווערט באנייעט צום יעצטיגן ווינטער זמן אין א מזל'דיגע שעה.
טויזענטער וויזניצע חסידים גרייטן זיך מיטצולעבן דעם היסטארישן שבת וואס קומט פאר דעם שבת נח ראש חודש חשון, מיטן נאמען "שבת שהחיינו", א מאסיווע הכנסת אורחים אפאראט איז אונטערגענומען געווארן צו קענען פלאצירן אזויפיל געסט, סיי אין די בניני הישיבה, און סיי אין ארומיגע האטעלן וואס זענען ארויסגעדינגען געווארן פאר דעם שבת. אין די זעלבע צייט קומט פאר מאסיווע צוגרייטונגען אויפן פלאץ, א גיגאנטישע שאטער איז געווארן אויפגעשטעלט פאר די טישן שבת קודש, און פאר די צענטראלע מעמד חנוכת הבית זונטאג לך לך.
די צענטראלע מעמד חגיגת חנוכת הבית און הכנסת ספר תורה וועט פארקומען זונטאג פרשת לך לך, ווען עס וועט געפייערט ווערן די מעמד חנוכת הבית במקהלות אלפי ישראל, אינאיינעם מיט א מעמד הכנסת ספר תורה וואס ווערט אריינגעגעבן צום היכל הישיבה, נדבת לבו פון הנגיד החסיד ר' יעקב אשר פעלדמאן הי"ו פון טאראנטא, בונה ומקים פון די בניני הישיבות אין נייעק. די טאג וועט זיך אנהייבן מיט די מעמד קביעת מזוזה פאר די נייע בנין פון ישיבה קטנה אור מרדכי, וואס ווערט געעפנט צום נייעם ווינטער זמן, דערנאך וועט פארקומען די סיום כתיבת האותיות אין היכל ישיבה גדולה בית נחום, נאכפאלגענדיג מיט די גרויסארטיגע תהלוכה און סעודת מצוה ברוב עם הדרת מלך אינעם ריזן שאטער.
