קאנגרעס ספיקער מייק דזשאנסאן וועלכער איז דער דריטער מאכטפולסטער פערזאן אין די פאראייניגטע שטאטן, איז היינט אנגעקומען אויף א ספעציעלע באזוך קיין ראקלענד קאונטי, צו קאמפיינען און באזוכן ביי עטליכע אדמורי"ם ורבנים אין בעפארברייטונג צו די וואלן קומענדיגע וואך, אינאיינעם מיט עטליכע רעפאבליקאנער פאליטיקאנטן, דער לאקאלער קאנגרעסמאן מייק לאולער און נאך.
צוערשט איז ער אנגעקומען אויף א באזוך ביי כ"ק אדמו"ר מוויזניץ שליט"א פון מאנסי, וואו עס זענען געווען אנוועזנד מערערע עסקנים און כלל טוער, עס איז אויסגעשמועסט געווארן פארשידענע ענינים העומדים על הפרק, איבערהויפט די ברענענדיגע נושא פון די גזירת החינוך אין ניו יארק.
דערנאך איז די דעלעגאציע אנגעקומען אויף א באזוך ביי כ"ק אדמו"ר מסאטמאר שליט"א, במעון הנופש פונעם רבי'ן אין פארשעי, דער רבי האט ארויסגעברענגט זיין גרייטקייט נאכצוקומען די פארלאנגען, אבער אין די זעלבע צייט שטארק געשתדל'ט למען אחינו בני ישראל, איבער מערערע פראיעקטן און ענינים וואס געפונען זיך אויפן טיש, להעביר את רוע גזירת החינוך און נאך פארשידענע וויכטיגע פונקטן.
נאכן באזוך ביים סאטמארער רבי'ן, זענען די עהרנפולע פאליטיקאנטן אנגעקומען קיין שיכון סקווירא, אויף א באזוך ביי כ"ק אדמו"ר מסקווירא שליט"א. צוערשט זענען זיי געווארן אויפגענומען דורך די חשובע עסקנים אין שטעטל, און ארומגעוויזן געווארן אין די נייע פראכטפולע בית המדרש אין שיכון סקווירא.
