אין די בארימטע מיעל מארט פעקעדזשינג פלענט אין קווינס, וואו עס ווערט פראדוצירט א ריזן קוואנטום פון פליישיגע מאכלים אונטער די סאטמארע השגחה, איז אנגעקומען אויף א השגחה באזוך הגאון הגדול רבי געציל בערקאוויטש שליט"א דומ"ץ קרית יואל ובעל אגלי דבש, צו זעהן פונדערנאנט די געוואלדיגע הידורים און געבן דעם הכשר אויף די פראדוקטן.
די השגחה אונטערן דיין שליט״א פארמאגט א אייגענע משגיח תמידי אויפן פלענט, וואס מאכט זיכער אז די גאנצע פראדוקציע און פעקעדזשינג קומט נאך די הויכע סטאנדארטן פון די סאטמארע הכשר, דער קרית יואל'ער דיין איז פערזענליך אראפגעפארן עס צו זעהן פונדערנאנט דעם סדר פון דער ארבעט דארט.
דער דיין איז געקומען אין באגלייטונג פון זיין חשובער זון הרב ר׳ חיים יחזקאל שליט״א, און איז געווארן אפגעווארט אין די פירמע דורך דער מענעדזשער הרה״ח ר׳ וואלף פריעדמאן הי"ו, הרב ר׳ יעקב יצחק יאקאבאוויטש שליט״א ראש המשגיחים אין מיעל מארט, און הרה"ח ר׳ משה חיים גליק וועלכער איז דער משגיח תמידי פון קהל יטב לב ד'סאטמאר. פאר לענגערע שעות האט דער דיין זיך אומגעקוקט אין די גאנצע פירמע געביידע און באטראכט אלע מאשינען, די הידורים און חומרות צוצושטעלן כשר'ע פלייש פאר אידישע קינדער אויפן מהודר'דיגסטן פארנעם.
ביים סוף פונעם באזוך, האט דער דיין גאר ווארעם געוואונטשן די ארבייטער, און די בעלי בתים פון די פירמע, און זיך אויסגעדרוקט גאר שטארקע התפעלות פון די הידורים בתכלית הכשרות וואס זעהט זיך אן אויף טריט און שריט.
