מיט גרויס צער און טרויער האבן פילע אידן באגלייט למנוחות הרב החסיד ר' אברהם שמעון מארגענשטערן ע"ה פון די חשובע גערער חסידים אין בארא פארק, א לאנגיעריגער מתפלל אין ביהמ"ד ברכת אליהו דחסידי גור, וואס ער איז געווען פון די מייסדים פון די בית המדרש. ער איז געווען דער איינציגסטער ברודער פון להבחל"ח הגה"צ ר' יצחק מאיר מארגענשטערן שליט"א אדמו"ר מתורת חכם.
ר' שמעון איז געווען א עובד ה' מנעוריו, א איד וואס האט אראפגעלייגט א ווארעמע חסידישע דאווענען ווי די פארצייטישע חסידים, ער פלעגט פארן קיין ארץ ישראל להסתופף בצל הקודש פון כ"ק אדמו"ר מגור שליט"א, ליידער איז ער פלוצלינג נפטר געווארן דעם שבת קודש נאכן ליידן פון א הארץ אטאקע, איבערלאזנדיג א שיינעם דור קע"ה.
די לוויה איז פארגעקומען זונטאג פארמיטאג פארנט פון ביהמ"ד ברכת אליהו דחסידי גור אין בארא פארק, מאנטאג נאכמיטאג איז פארגעקומען די לוויה ביי ביהמ"ד תורת חכם אויף רחוב אהלי יוסף אין ירושלים, דערנאך איז עס אריבער פארנט פון ביהמ"ד הגדול דחסידי גור, וואו כ"ק אדמו"ר מגור שליט"א איז ארויסגעקומען באגלייטן דעם חשובן נפטר.
דער ברודער כ"ק אדמו"ר מתורת חכם הרה"צ ר' יצחק מאיר מארגענשטערן שליט"א, זיצט שבעה בביתו נאוה קודש אויף רחוב תכלת מרדכי אין ירושלים.
