ויהי נועם נשבת במוצאי שבת, ווען עס קומט אן די ביטערע בשורה איבער די פטירה פון האי גאון וצדיק הי חסיד הי עניו, הרב הצדיק רבי משה אהרן רייך זצ"ל גאב"ד פשעווארסק וויליאמסבורג, וועלכער איז דעם שבת נפטר געווארן לדאבון לב בית ישראל זייענדיג אין שפיטאל אין אנטווערפן, אין עלטער פון 77 יאר.
הרה"צ רבי משה אהרן זצ"ל איז געווען א זון פון הרב החסיד ר' אברהם שמעון רייך ז"ל, און איז אויסגעקליבן געווארן אלס חתנא דבי נשיאה ביי כ"ק אדמו"ר הרה"ק רבי יענקעלע מפשעווארסק זי"ע, וועלכער האט זיך אסאך משתעשע געווען מיט זיין באליבטער איידעם, און זיך אויסגעדרוקט אויף אים גאר גרויסע זאכן.
דער רב זצ"ל איז געווען א גרויסער מכניס אורח, סיי אין די יארן וואס ער האט געוואוינט אין אנטווערפן, און סיי ווען ער האט געוואוינט אין וויליאמסבורג, שטייענדיג אין די שפיץ פון דעם שיינעם פשעווארסקער בית המדרש, וואו ער האט משפיע געווען תורה וחסידות.
מיט עטליכע יאר צוריק אין די קאראנע עפאכע האט ער ליידער פארלוירן זיין רעבעצין הרבנית שרה חנה פעסיל ע"ה, ברתא דמלכא פון הרה"ק מפשעווארסק זי"ע, ליידער האט דער רב זעלבסט זיך געמוטשעט א לאנגע תקופה מיט זיין געזונט, און דעם שבת קודש איז ער נפטר געווארן לחיי העולם הבא, איבערלאזנדיג א הערליכע דור, און פילצאליגע ידידים ומעריצים וואס קלאגן אויף דעם שווערן פארלוסט.
די מסע הלוי' וועט פארקומען מארגן זונטאג 2:00 נאכמיטאג ביי ביהמ"ד פשעווארסק אין אנטווערפן.
