אין א ערשטמאליגע שריט האט כ"ק אדמו"ר מסקווירא שליט"א ארויסגענומען די היסטארישע ירושה חפצים וואס געפונען זיך באהאלטן בגנזי המלך, מירושת צדיקים הקודמים די זיידעס למעלה בקודש, ספעציעל פאר די נדיבים ותומכים וואס האבן זיך אנגעשלאסן מיט פרישע זעקס און צוואנציג טויזנט דאללער צו פאראויסשטופן די אנגייענדע מלאכת הבניה, אהערצושטעלן מיט פראכט די נייע גרויסע בית המדרש אין סקווירא שטעטל.
ווי שוין באריכטעט מיט עטליכע וואכן צוריק, איז געלאזט געווארן אין גאנג דעם ספעציעלן קאמפיין אונטערן נאמען "ירושת אבותי", ווען פילצאליגע חסידים האבן זיך אנגעשלאסן מיט די באשטימטע סכום צו קענען מיטהאלטן די ערשטמאליגע מאמענטן, די מעמד איז פארגעקומען אין די פראכטפולע "לעגאסי קעסל" זאל אין ניו דזשערזי, וואו עס איז סערווירט געווארן א רייכע סעודה באגלייט מיט א אינהאלטסרייכע פראגראם, ווען צו די טעכנישע דעטאלן איז שטארק צוהילף געקומען די ברייט בארימטע רענטעסטיק פארטי רענטל פירמע.
אריינקומענדיג אין זאל אויפן העכערן שטאק איז געווען אויסגעשטעלט א מייסטערהאפטיגע אויסשטעלונג מגנזי המלך, היסטארישע בריוון און דאקומענטן פון די פריערדיגע יארן ביי די הייליגע צדיקים, צווישן זיי אן אדרעס ביכל פון כ"ק אדמו"ר הרה"ק מסקווירא זצ"ל אין זיינע ערשטע יארן אין אמעריקע, א טעלעגראם וואס הנגיד המפורסם ר' אברהם יוסף (מוניע) שפירא ע"ה האט געשיקט פארן רבי'ן זצ"ל, א ראמענישער פאספארט מיט א בילד פונעם רבי'ן זצ"ל אלס בחור, רייזע בילעטן פאר די באנען, פארנדיג פון פראג קיין אנטווערפן אין יאר תש"ח, א געזונט באשטעטיגונג אז דער רבי זצ"ל האט גענומען א וואקסין זייענדיג אין ארץ ישראל, און נאך העכסט אינטערסאנטע דאקומענטן און בריוון פונעם רבינ'ס שאץ קאמער.
בהוראת הקודש פונעם רבי'ן שליט"א זענען געשטעלט געווארן צוויי שליחים נאמנים צו אכטונג געבן אויף די הייליגע חפצים דורכאויס דעם גאנצן מעמד, הרה"ח ר' שמואל גרובער הי"ו און הרה"ח ר' יעקב יוסף ראזענבלום הי"ו, מגדולי החוקרים בחצר הקודש סקווירא, זיי האבן צוגעברענגט פארן רבי'ן אלע חפצים און עס דערנאך איבערגענומען נאכן צייגן פארן ציבור.
אויך האט מען ספעציעל געמאלדן אז ווער עס איז נישט געווען אין מקוה יענעם טאג צוליב סיי וועלכע סיבה, זאל חלילה נישט צורירן צו די הייליגע חפצים, און פילע פון די משתתפים זענען געגאנגען ספעציעל אין מקוה הארט בעפאר די מעמד צו מוסיף זיין קדושה וטהרה.
פינף און פערציג חפצי קודש זענען געוויזן געווארן פארן ציבור דורכאויס די הערליכע פארשטעלונג, ווען צום סוף זענען געוויזן געווארן די גאר טייערע חפצים, צום לעצט די הייליגע שטעקן פונעם טשערנאבילער מגיד זי"ע, און עטליכע בעפאר די ירושה קאפטן פונעם הייליגן רבי'ן ר' זושא זי"ע, צו וואס ביידע חפצי קודש האט זיך דער רבי אויפגעשטעלט מלא קומתו און עס געוויזן פארן ציבור.
ביי יעדע חפץ קודש האט דער רבי מסביר געווען און דערציילט די היסטאריע וואס ליגט דערונטער, און די השתלשלות וויאזוי דאס איז אריבער מדור אחר דור.
