חסידי סקווירא איבער די וועלט פרייען זיך מיט די הרחבת גבולי הקדושה אינערהאלב די סקווירא קהילה אין מאנטשעסטער, ווען אין די יעצטיגע טעג איז די הנהלת התלמוד תורה אריין אין קאנטראקט אפצוקויפן א שיינע גרויסע געביידע וואס וועט דינען אלס אכסניא של תורה, און ארייננעמען אין זיך די צאן קדשים, ילדי התלמוד תורה תולדות יעקב יוסף דחסידי סקווירא אין מאנטשעסטער.
די תלמוד תורה איז געגרינדעט געווארן נישט לאנג צוריק מיט א הייפעלע קינדערלעך, ילדי חן פון די סקווירא קהילה אין מאנטשעסטער ענגלאנד, ביזדערווייל איז די חדר געווען איינקוואטירט אין א געדונגענע לאקאציע, און אצינד מיטן אפקויפן די נייע בנין רחבת ידים וועט עס צוברענגען גרויס הרחבת הדעת סיי פאר די תלמידים און סיי פאר די חברי ההנהלה.
בברכת קדשו פון כ"ק אדמו"ר מסקווירא שליט"א איז מען אריין אין קאנטראקט אפצוקויפן די גרויסע הייוויו אפיס געביידע אויף גרעיט קלאוס סטריט אין סעלפארד מאנטשעסטער, אינעם זעלבן בנין איז איינקוואטירט א לאקאלער בית המדרש, וואס וועט אויף דערווייל פארבלייבן אין די געביידע, ווילאנג די סקווירא חדר פארנעמט נישט דעם גאנצן בנין.
נעכטן דינסטאג איז הגה"צ ר' יצחק טווערסקי שליט"א געווען צוגאסט אויף א בליץ באזוך אין מאנטשעסטער, זייענדיג אונטערוועגנס קיין לאנדאן צו באשיינען א מעמד הכנסת ספר תורה. זייענדיג אין מאנטשעסטער האט ער באזוכט די נארוואס געקויפטע בנין, וואו ער איז באגלייט געווארן דורך די עסקני קרן הבנין און די חברי הנהלה, וואס האבן צוגעוויזן דעם בנין מיט אלע דעטאלן.
