אין די יעצטיגע טעג האבן באזוכט בבתי גדולי ישראל בארץ הקודש, א גרופע אידישע פארמערס פון פארשידענע געגנטער אין ארץ ישראל, וואס היטן שמיטה כדת וכדין, און זענען געקומען אין באגלייטונג פון די געטרייע עסקנים אינערהאלב "קרן השביעית", וואס געבן פינאנציעלע און גייסטישע שטיצע פאר די מוסרי נפש לתורה ומצוות.
דאס קומט נאכדעם וואס אין די לעצטערע וואכן הערשט א ערנסטע רעגן מאנגל אין ארץ ישראל, און די פארמערס מוטשענען זיך זייער שטארק צו קענען שניידן די פירות פון די פעלדער, עס זאל ח"ו נישט צוקומען צו א מאנגל אין תבואה און לעבנסוויכטיגע פראדוקטן.
די אידישע פארמערס שומרי שמיטה האבן באזוכט אין שטוב פון הגאון הגדול רבי דוב לאנדא שליט"א ראש ישיבת סלאבאדקע, און אין שטוב פון הגאון הגדול רבי מאיר צבי בערגמאן שליט"א מגדולי ראשי הישיבות בארצה"ק, ביי הגאון הגדול רבי ברוך דוב פאווארסקי שליט"א ראש ישיבת פאנאוויטש, ביי הגאון הגדול רבי מסעוד בן שמעון שליט"א ספרדישער רב פון בני ברק, ביי הגאון הגדול רבי יצחק זילבערשטיין שליט"א רב שכונת רמת אלחנן, ביי הגאון הגדול רבי מרדכי שמואל אדלשטיין שליט"א רב קהילת נחלת יעקב ב"ב, ביי הגאון הגדול רבי חיים יצחק אייזיק לאנדא שליט"א גאב"ד בני ברק, און ביי הגאון הגדול רבי משה שאול קליין שליט"א רב שכונת אור החיים ומגדולי הפוסקים בדורינו.
די גדולי הדור האבן ווארעם געוואונטשן און מחזק געווען די אידן, איבער די געוואלדיגע השפעות וואס קומט פון אויבן ווען מ'פאלגט אויס אלע מצוות התורה, און דערביי האט מען געזאגט די ספעציעלע תפילה וואס מען איז מתפלל אז עס זאל רעגענען מיט שפע.
