מיט גרויס צער און טרויער ווערט אויפגענומען די ביטערע בשורה איבער די פטירה פון אחד מגדולי הרבנים בעיר התורה והחסידות בארא פארק, הגה"צ המפורסם רבי משה צבי זאבערמאן זצ"ל לאנגיעריגער מרביץ תורה אין שטאט, וועלכער האט זיך ליידער געמוטשעט די לעצטערע יארן מיט א שווערע מחלה ה"י.
הגה"צ ר' משה זצ"ל ווי מ'פלעגט אים רופן, איז געווען א זון פון הגה"צ ר' אלקנה זאבערמאן זצ"ל אבד"ק יארדינאוו, און אן איידעם ביי הגה"צ ר' אברהם ברוך ראזענבערגער זצ"ל אבד"ק גמזו, זון פון הגה"צ בעל תורת יקותיאל מדיערעש זצ"ל. ער איז געווען א תלמיד חכם עצום, און שולט געווען בכל מכמני התורה, יארן לאנג איז ער געווען פון די גרעסטע מגידי שיעור אין בארא פארק, פארגעלערנט טעגליכע שיעורים אין ביהמ"ד הגדול באבוב, און אין ביהמ"ד שומרי שבת, וואו זיינע שיעורים האבן געצויגן מאסן משתתפים, אין צוגאב צו נאך טויזענטער אידן וועלכע האבן נהנה געווען און זיך צוגעהערט מיט א קביעות צו זיינע רעקארדיטע שיעורים אויף פארשידענע וועגן.
ליידער איז די לעצטע פאר יאר געווען ספר תורה שרוי בצער, זייענדיג פארשלאפט אין א שווערע געזונט צושטאנד, און היינט פארטאגס האט ער צוריקגעגעבן זיין ריינע אויסגעלייטערטע נשמה ליוצרה, אין בליענדן עלטער פון צוויי און זיבעציג יאר, איבערלאזנדיג א הערליכע דור, גאר חשובע קינדער מרביצי תורה און מורי הוראה.
די גרויסע לוויה וועט זיך אנהייבן צען אזייגער פארמיטאג אין ביהמ"ד הגדול באבוב אין בארא פארק, וואו מען וועט אריינברענגען די מיטה אין אלטע ביהמ"ד, באותו מקום וואו ער האט אזויפיל יארן מרביץ תורה געווען לאלפים, דערנאך וועט פארקומען די מסע הלוויה אין ביהמ"ד שומרי שבת אין בארא פארק.
זכר צדיק לברכה.
