די געלונגענע "מצא טוב" רעוואלוציע וואס ווערט איינגעפירט אין אלע קהילות הקדושות אין שטאט מאנסי, מיטן ציהל אוועקצושטעלן פרישע סטאנדארטן ארויסצוהעלפן אידישע קינדער בעת שמחתם, און שפארן פאר מחותנים שווערע טויזענטער דאללארן אין קריטיש וויכטיגע שמחה צייטן, איז די וואך ארויף א פרישן שטאפל ווען עס איז פארגעקומען א העכסט מוצלח'דיגע אסיפת הרבנים בביתו נאוה קודש פון כ"ק אדמו"ר מוויזניץ שליט"א אין מאנסי, מיט די באטייליגונג פון די רבני הקהילות פון אלע גרעסערע קהילות אין שטאט מאנסי.

די מצא טוב רעוואלוציע איז שוין איינגעפעדימט אין די וויזניצע קהילה נאנט צו א יאר צייט, און האט שוין געשפארט שווערע מיליאנען פאר אריבער צוויי הונדערט מחותנים בעת שמחתם, ווען די נייע סטאנדארט איז געווארן אוועקגעשטעלט אויף ביליגע פרייזן, ווען עס ווערט צוגעשטעלט פון די שענסטע און בעסטע פאר שפאט ביליג. אצינד ווערט די רעוואלוציע פארשפרייט צווישן אלע קהילות אין שטאט מאנסי, מיט א פאראייניגטע שטיצע פון אלע רבני העיר לאורך כל הדרך.

אין די נאנטע צוקונפט וועט זיך עפענען א שפאגל נייע לאקאל וואו "מצא טוב" וועט אהערשטעלן די פראכטפולע סחורה, אלעס וואס פעלט זיך אויס פאר מחותנים בעת שמחתם, פון פורניטשור ביז צירונגען, שטריימלעך און קליידונג, און אלעס וואס א מחותן דארף קויפן, און האפט עס צו קענען באקומען אין רעגלמעסיגע פרייזן וואס זיין בערזל קען זיך ערלויבן. ווען מ'רעכנט צוזאם דעם גרויסן ליסטע ווערט געשפארט א געשאצטע דרייסיג אלפים פאר יעדן מחותן, און פארשפארט אומגעוואונטשענע עגמת נפש וואס קיינער זוכט זיך נישט אין צייט פון א שמחה.

צום אסיפת הרבנים אין שטוב פונעם וויזניצער רבי'ן שליט"א, וואס איז פארגעקומען דעם זונטאג משפטים נאכמיטאג, זענען געלאדנט געווארן די רבני העיר פון אלע גרעסערע קהילות הקודש אין מאנסי, אריינגערעכנט ביידע סאטמארע קהילות, בעלזא, סקווירא, באבוב, באבוב 45, און פאפא, און א גרעסערע אסיפת הרבנים וועט פארקומען אין די נאנטע צוקונפט וואו עס וועלן זיך באטייליגן אלע רבני העיר, מיטן ציהל צו באפעסטיגן די פרישע אונטערנעמונג, און איינפעדימען די נייע סטאנדארטן איבער די גאנצע שטאט.

עס האט אויפגעטרעטן הגה"צ ר' חיים פייוויל שנעעבאלג שליט"א אב"ד קהל אברכים, וועלכער האט אדרעסירט דעם שרעקליכן פראבלעם וואס הויערט אויף מחותנים ביים חתונה מאכן, און די מוצלח'דיגע לעזונג וואס האלט שוין אין אנטוויקלונג, ווען מען דארף עס נאר פארשפרייטן ארויסצוהעלפן נאך אידן. אויך האט אויפגעטרעטן העסקן הנמרץ ר' שלמה אליעזר מייזעלס הי"ו, וועלכער האט קלארגעשטעלט די גענויע פלענער וואס מען וויל איינפירן, און דערנאך האט מען געהערט עטליכע ווערטער פון הנגיד המרומם ר' הערש אלימלך פיש הי"ו בריח התיכון פון דעם גאנצן אונטערנעמונג, וועלכער האט שוין אריינגעגאסן איבער א מיליאן דאללער אין דעם פראיעקט, מיטן איינציגן ציהל ארויסצוהעלפן אידישע קינדער חתונה מאכן אין א רואיגע פארנעם בדרך כבוד.

די רבנים און עסקנים האבן געשמועסט א שטיק צייט איבער די יסודות פון די נייע רעוואלוציע, וואס שטעלט אריין עטליכע פונקטן איינצופעדימען די נייע סטאנדארטן, איבער די סארט צירונגען וואס מען גיבט, די סארט און צאל מתנות און וויפיל דאס דארף קאסטן, די סארט מעבל און חתן וכלה שטאפיר, פארשידענע טוישונגען אין די סדרי השמחה, ווי דאס אז מען מאכט נישט קיין באזונדערע מסיבת תנאים, צו איבריגע שבע ברכות'ן און דאס גלייכן.

אויך איז אויסגעשמועסט געווארן די קלארע פאקטן וואס באגלייט דעם רעוואלוציע, און די הויפט שליסלעך וויאזוי דאס וועט מצליח זיין מיטן אויבערשטנס הילף. דאס ערשטע אז עס איז שוין א פאקט איבער א יאר אין די וויזניצע קהילה, און האט פאקטיש געברענגט געוואונטשענע רעזולטאטן. דערנאך איז די פאקט אז עס איז נישט קיין תקנות, נאר א אפענע הילף וואס ווערט נישט פארלאנגט. אין צוגאב דערצו וועט עס קומען באגלייט מיטן פולסטן שטיצע פון אלע רבני העיר וואס וועלן געבן דעם שטופ פאר די חברי הקהילה זיך אנצושליסן דערין, באגלייט מיט א מעכטיגע אלגעמיינע מארקעטינג וואס וועט בעז"ה טוישן דעם דעת הקהל צו טון וואס עס איז ריכטיג.