הויכפונקט פונעם מעמד: התרגשות'דיגע דברות קודש פון הגה"צ המקובל רבי אביש צעהנווירטה שליט"א, איבער די געוואלדיגע אוצר בתורת הקבלה, און די גילויים נשגבים פון כ"ק מרן הרה"ק בעל הסולם מאשלג זיע"א וואס האט מגלה געווען די וועג וויאזוי צו לערנען דעם הייליגן זוהר הק', און די וועג צו פארשטיין די אורות פון תורת הקבלה
א זעלטן היסטארישע מעמד איז פארגעקומען פארלאפענעם דאנערשטאג פרשת תצוה בליל ז' אדר, אינעם עיר הקודש והמקודש אתרא קדישא מירון, ביום המסוגל ווען אידישע קינדער אין אלע דורות פלעגן ארויספארן קיין אתרא קדישא מירון צו וויילן בצילא קדישא פונעם הייליגן תנא רבי שמעון בר יוחאי זי"ע.
די מעמד אדיר מיטן נאמען "נכספה" איז געווען געווידמעט פאר איין איינציגן ציהל, צו פארשפרייטן און מחזק זיין דעם הייליגן לימוד בתורת הקבלה, לימוד הזוהר הק' מיט פארשטאנד, מיטן הילף פון די וועלט בארימטע פירוש "בני היכלא" פארפאסט דורך כ"ק אדמו"ר מאשלג שליט"א, אלס אן המשך צו די הייליגע ספרי קבלה פון כ"ק אדמו"ר הרה"ק מאשלג זצ"ל דער בעל הסולם, וועלכער האט אויפגעלאכט די וועלט אין דעם געביט, און אריינגעברענגט א פרישע אור בלימוד הזוהר הק'.
דורכאויס די מעמד האבן באשיינט בראש המסובים גאר חשובע גאוני עולם, מנהיגי ישראל בארץ הקודש ומגדולי המקובלים, כ"ק אדמו"ר מתורת חכם שליט"א, כ"ק אדמו"ר מאשלג שליט"א, הגה"צ המקובל רבי אביש צעהנווירטה שליט"א, כ"ק אדמו"ר מנחלת אהרן שליט"א, הגה"צ המקובל רבי טובי' שטערן שליט"א גאב"ד מירון, הגה"צ רבי אלעזר שטערן שליט"א גאב"ד מירון, כ"ק אדמו"ר מוויטעבסק שליט"א, הגה"צ המקובל רבי גמליאל ראבינאוויטש שליט"א, הגה"צ רבי ברוך האגער שליט"א אב"ד קהל יראים אשדוד, און הגה"צ רבי אליהו אשלג שליט"א רב ביהמ"ד אשלג.
אלס יושב ראש המעמד האט געדינט הרה"ג ר' יחזקאל טויסיג שליט"א, זון פונעם באקאנטן משפיע הגה"צ ר' אהרן טויסיג שליט"א. עטליכע מאל האט ער אויפגעטרעטן מיט פלאם פייערדיגע ווערטער איבער די הייליגקייט פון די דאזיגע מעמד און וואס מען קען אלס אהיימנעמען פון דא.
דברות קודש האט מען געהערט פון כ"ק אדמו"ר מאשלג שליט"א, וועלכער האט אצינד געברענגט א פרישע אור בתורת הקבלה, מיטן נייעם חיבור "בני היכלא" אויפן ספר הזוהר הק', וואס ער האט פארפאסט אויפן דירעקטן בקשה פון פילע גדולי ישראל וואס האבן ארויסגעקוקט דערויף אז אידישע קינדער זאלן קענען עוסק זיין בתורת הנסתר מיטן ריכטיגן אפטייטש.
דער רבי שליט"א האט ארומגערעדט איבער די גרויסקייט פונעם טאג ז' אדר די הילולא פון משה רבינו, און די שייכות צווישן דעם בעל ההילולא משה רעיא מהימנא מיט התנא האלקי רבי שמעון בר יוחאי, וועלכער האט פארשפרייט דעם אור הקבלה דעם אור הגנוז.
די קלימאקס פונעם גייסטרייכן מעמד איז געווען די רירנדע דברות קודש פון הגה"צ המקובל רבי אביש צעהנווירטה שליט"א, וועלכער האט פאר לענגערע מינוטן ארומגערעדט בגודל קדושת הזמן, און די געוואלדיגע אורות וואס ערשיינט בעולם הקבלה. דערביי האט רבי אביש א לענגערע צייט ארומגעשמועסט איבער די פעולות נשגבות פונעם הייליגן בעל הסולם זצ"ל, די געוואלדיגע דערגרייכונגען וואס ער האט אריינגעברענגט אין די היינטיגע וועלט צו פארשטיין געבן און ארויסהעלפן אידן צו לערנען בתורת הקבלה מיט פארשטאנד.
אויך האבן אויפגעטרעטן די חשובע ברידער הגאוה"צ רבי טובי' און רבי אלעזר שטערן שליט"א רבני אתרא קדישא מירון, ממשיכי דרכו בקודש פון הגה"צ רבי מאיר שטערן זצ"ל גאב"ד מירון. צום שלוס האט מען געהערט דברות קודש ודברי חיזוק פון הגה"צ רבי יצחק מאיר מארגענשטערן שליט"א אדמו"ר מתורת חכם, און א דרשה פון המשפיע הגה"צ ר' זרח ראזענטאל שליט"א, וועלכער האט צוזאמגענומען די אלע דרשות, און פאראייניגט אלע משתתפים זיך צו מקבל זיין א קבלה טובה, צו לערנען כאטש פינף מינוט אין דעם הייליגן ספר הזוהר הק' באגלייט מיטן נייעם פירוש בני היכלא.
די גאנצע מעמד וואס איז פארגעקומען אין א פראכטפולע זאל אין אתרא קדישא מירון, איז באגלייט געווארן מיט א הערליכע און פאכמאנישע מוזיקאלישע פרעזענטאציע, הארציגע לידער און לעבעדיגע מוזיק לכבוד היום הגדול ז' אדר, אונטער די געניטע פירערשאפט פונעם טאלאנטפולן בעל מנגן ר' יעקב דאסקאל הי"ו.
די ריזן ציבור וואס האבן מיטגעהאלטן דעם גייסטרייכן מעמד, זענען אהיימגעגאנגען נאך לאנגע שעות פון תענוג רוחני, מיט פרישע אוצרות און אורות צו פארשטיין און קענען לערנען דעם ספר הזוהר הק' מיטן רייכטיגן אפטייטש, א ליכטיגקייט אין פנימיות התורה על פי דרך החסידות, אויפן אויסגעטראטענעם וועג פונעם בעל שם טוב הק' זי"ע און זיינע תלמידים.
אן די פירוש הסולם, וואלט די עולם לימוד הזוהר געבליבן פארמאכט
רירנדע און גייסטרייכע דרשה פון הגה"צ המקובל רבי אביש צעהנווירטה שליט"א
ווי דערמאנט איז די הויכפונקט פונעם מעמד געווען די היסטארישע דרשה פון הגה"צ המקובל רבי אביש צעהנווירטה שליט"א, וועלכער האט ארומגערעדט א לענגערע צייט איבער די געוואלדיגע אוצר בתורת הקבלה, און די גילויים נשגבים פון כ"ק מרן הרה"ק בעל הסולם מאשלג זיע"א וואס האט אריינגעברענגט פרישע אורות בתורת הקבלה ווי קיינמאל בעפאר.
הגה"צ רבי אביש האט אנגעהויבן מיט זיינע ווערטער איבער די גרויסקייט פונעם הייטיגן טאג ז' אדר, א טאג וואס אידישע קינדער אין אלע דורות האבן אויסגענוצט זיך צו מחזק זיין בתורת קבלה, ווען דער אריה"ק שרייבט אז רבי שמעון בר יוחאי האט געהאט א ניצוץ נשמה פון משה רבינו עליו השלום.
דאן האט ער ממשיך געווען א לענגערע שמועס איבער דאס קובע זיין שיעורים אין זוהר הק' און ספרי קבלה, א זאך וואס איז געווען פארהייליגט אין אלע דורות און די צדיקים וקדושים האבן זיך דערצו מקדש ומטהר געווען, די גדולי המקובלים פון די פריערדיגע דורות האבן פארשיינט די וועלט מיט זייערע חיבורים, אבער אין אונזער לעצטן דור האט געפעלט א שטארקע אור וואס זאל אנטפלעקן דעם תורת הקבלה פאר די היינטיגע מענטשן, ווען די דורות פאלן און עס איז נישטא די קלארקייט ווי אמאל.
אט דאס האט דער הייליגער צדיק דער בעל הסולם זיע"א אויפגעטון בתורת הקבלה, ווען ער האט פארפאסט דעם חיבור און אריינגעברענגט א פרישן אור בתורת הקבלה, אז אויך אין די היינטיגע דורות זאל מען קענען לערנען און זיך מעמיק זיין דערין, טון די מצוות השם מיט אן אמת און זוכה זיין צו אלע השפעות וואס קומט באגלייט דערמיט.
דער הייליגער בעל הסולם האט געעפנט די שערי הזוהר הק' פאר יעדן איד! האט הגה"צ ר' אביש געזאגט, אין זכות פון זיין פירוש איז די ספר הזוהר מער נישט קיין אייגענטום פון בלויז יחידי סגולה, נאר א לעכטיגע תורה וואס באלייכט פאר יעדער איד וואס זוכט דעם בורא כל עולמים.
דאן האט ר' אביש געזאגט אז יעדער איד באזונדער, צו קענען ארויסגיין פון זיין אייגענע רוחניות'דיגע גלות, איז די פירוש הסולם איינס פון די שטערקסטע מיטלען צו זוכה זיין צו די אייגענע גאולה, ווי רבי שמעון בר יוחאי האט מגלה געווען "בהאי חיבורא יפקון מן גלותא".
דערנאך האט ר' אביש ארומגערעדט איבער די וויכטיגקייט פון זיך מעמיק זיין בתורת הזוהר, און געזאגט אז לערנען זוהר בעיון והבנה איז נישט קיין ענין פון שכל, נאר א חיבור צו די נשמה פון די תורה, א קשר צו די יסודות פון אמונה, און צו דעם הייליגן וועג וואס יעדער איד קען אויפלייכטן דערמיט און לעבן מיט א פנימיות.
הגה"צ ר' אביש האט מאריך געווען במשנתו פונעם הייליגן בעל הסולם, ווי שטארק ער האט זיך אפגעגעבן מיטן פארשפרייטן אור התורה, מחזק זיין אידישע קינדער צו לערנען דערין און אריינגעברענגט א לעכטיגע אור בתורת הקבלה, אויפן אויסגעטראטענעם וועג פון די פריערדיגע צדיקים וקדושים אשר מפיהם אנו חיים.
צום שלוס האט הגה"צ ר' אביש זיך אויסגעדרוקט אז די נייע פירוש "בני היכלא" איז ערווארטעט אויפצוברענגען א פרישע מהפכה אין לימוד הזוהר הק', ווען אידישע קינדער וועלן האבן דעם קלארקייט דערין, און קענען עוסק זיין בתורת הסוד מיט א פרישע דערגרייכונג און פארשטאנד, אז יעדע איינציגער איד זאל זיך קענען מחבר זיין צום אור התורה בפנימיות.
