מיט גרויס צער ווערט אויפגענומען די שווערע בשורה איבער די פטירה פון הגאון הצדיק המפורסם כ"ק גאב"ד פאלטישאן, הרה"צ רבי מרדכי שטיין זצ"ל, וועלכער איז נפטר געווארן דעם שבת קודש שביעי של פסח אין עלטער פון פיר און אכציג יאר, נאכן נישט זיין געזונט א לענגערע צייט ה"י.
דער פאלטישאנער רב זצ"ל איז געווען פון די גאר חשובע רבנים אינעם היינטיגן דור, מזה בן מזה, בנו הגדול פון כ"ק הגה"צ רבי ישראל אברהם שטיין זצ"ל גאב"ד פאלטישאן, וועלכער איז געווען פון די גרעסטע גדולים ומורי הוראה אינעם פריערדיגן דור, חתנו וממלא מקומו פון כ"ק אדמו"ר מפאלטישאן זצ"ל בעל פקודת אלעזר.
דער רב זצ"ל איז געווען אן איידעם ביי כ"ק אדמו"ר מספינקא פון ירושלים הרה"ק רבי יוסף מאיר כהנא זצ"ל, און ממשיך געווען שלשלת אבותיו הקדושים לשם ולתפארת, בבית מדרשו אויף די ניין און פערציגסטע סטריט אין בארא פארק, וואס איז געווען א תל תלפיות פאר פילצאליגע חסידישע אידן מבקשי השם.
זייענדיג א נואם בחסד עליון איז ער ווי זיין פאטער געווען א פה מפיק מרגליות, אויפגעטרעטן מיט דרשות און שמועסן און משפיע געווען פאר אידישע קינדער, געווען א דולה ומשקה פון זיינע גרויסע רבי'ס, הרה"ק בעל אמרי חיים מוויזניץ זי"ע ביי וועם ער איז אויפגעוואקסן אין זיינע יונגע יארן, הרה"ק מסאטמאר זי"ע ביי וועם ער האט זיך פיל מסתופף געווען, און שפעטער פלעגט ער אסאך פארן קיין מאנסי להסתופף בצל הקודש פון הרה"ק בעל תורת מרדכי מוויזניץ זי"ע.
א שיינע תקופה האט ער געדינט אלס מנהל אין די גרויסע סאטמארע ישיבה, און אזוי אויך האט ער געדינט אלס מנהל אין די מונקאטשע ישיבה, וואו ער האט אויפגעשטעלט פילצאליגע תלמידים נאמנים, און זיי דערהויבן בדרך התורה והחסידות.
ליידער איז אין די לעצטע פאר יאר געווען ספר תורה שרוי בצער, ווען דער רב איז געווען אין א שוואכע געזונט צושטאנד ל"ע, אין די לעצטע פאר וואכן האט זיך זיין מצב דראסטיש פארערגערט רח"ל, און דעם שבת קודש שביעי של פסח איז ער נפטר געווארן לחיי העולם הבא. די לוויה איז פארגעקומען היינט ביום אחרון של פסח בבית מדרשו אין בארא פארק, וואו עס האט זיך פארזאמלט א ריזן ציבור תושבי העיר, אין שפיץ פון פילע אדמורי"ם ורבנים, צווישן זיי כ"ק האדמורי"ם מטשערנאביל, ראחמיסטריווקא, וויזניץ פון בארא פארק, וויזניץ פון ירושלים, גאב"ד טענקא, אבד"ק נירבאטור, אבד"ק מראה יחזקאל, אבד"ק יאקע, און נאך.
הגה"צ אב"ד נעפלעמיץ שליט"א שוואגער פונעם רב זצ"ל האט פארגעזאגט פרקי תהילים. און אין נאמען פון די חברי הקהילה האט אויפגעטרעטן הרה"ג ר' יוסף מנחם דייטש שליט"א אבד"ק קליינווארדיין, וועלכער האט דערביי אויפגענומען און מכתיר געווען בנו הגדול הגה"צ רבי יצחק שטיין שליט"א ראב"ד פאלטישאן אלס ממלא מקום אנצופירן די שיינע קהילה. דאן האט בנו מ"מ הגה"צ רבי יצחק שטיין שליט"א גאב"ד פאלטישאן זיך געזעגנט מיט קורצע דיבורים.
דערנאך איז די לוויה אריבער פארנט פון מונקאטשער בית המדרש, וואו כ"ק אדמו"ר ממונקאטש שליט"א איז ארויסגעקומען זיך געזעגענען פון ידידו ורעו דער רב זצ"ל וועלכע האט לאנגע יארן געדינט אלס מנהל אין ישיבת מונקאטש.
דאן איז דער רב זצ"ל געפירט געווארן לקבורה קיין לאנג איילענד. ווען אונטערוועגנס האט מען זיך אפגעשטעלט אין וויליאמסבורג. די מיטה איז אדורכגעפירט געווארן ביהמ"ד הגדול וויזניץ אין וויליאמסבורג, וואו כ"ק האדמו"ר מוויזניץ שליט"א פון וומ"ס האט אפגעשטעלט דאס דאווענען און איז אינאיינעם מיט די מתפללים ארויס באגלייטן די מיטה פון רב זצ"ל. דארט איז אויך אריבערגעקומען כ"ק האדמו"ר מצעהלים שליט"א – שוואגער פונעם נפטר, וועלכע האט אויך אפגעשטעלט דאס דאווענען בבית מדרשו אפצוגעבן דעם כבוד האחרון.
פון דארט איז די מיטה אריבערגעפארן קיין ראדני סטריט ביים ביהמ"ד הגדול ד'סאטמאר וואו כ"ק האדמו"ר מסאטמאר שליט"א האט אפגעשטעלט דאס דאווענען און אינאיינעם מיט אלפי חסידי סאטמאר, צווישן זיי הונדערטער תלמידים פונעם רב זצ"ל, האבן מען באגלייט די מיטה.
דערנאך האט מען זיך אפגעשטעלט אויף לי עוועניו נעבן די הייוועי, וואו עס האבן זיך משתתף כ"ק האדמו"ר מבית יצחק ספינקא שליט"א – פלומעניק פונעם רב זצ"ל און כ"ק האדמו"ר מתולדות צבי ספינקא שליט"א וועלכע האט אויך אויפגעטרעטן מיט קורצע דיבורים.
דער רב זצ"ל לאזט איבער א זעלטן הערליכע דור, גאר חשובע קינדער בנין וחתנין רבנן, בנו הגדול הגה"צ ר' יצחק שטיין שליט"א גאב"ד פאלטישאן, איידעם ביי כ"ק אדמו"ר מוואוידיסלאוו זצ"ל, הגה"צ ר' דוד שלמה שטיין שליט"א ראה"כ ספינקא, איידעם ביי כ"ק אדמו"ר הרה"ק מספינקא זי"ע, הגה"צ ר' מענדיל שטיין שליט"א אבד"ק סאווראן, איידעם ביי הגה"צ אבד"ק ווייטצען זצ"ל, הגה"צ ר' אלעזר שטיין שליט"א, איידעם ביי כ"ק אדמו"ר מלויעוו טשערנאביל שליט"א, און די קינדער פון זיין זון הגה"צ ר' אפרים אהרן שטיין ז"ל.
די איידימער זענען הגה"צ ר' ברוך נתן האלבערשטאם שליט"א אבד"ק סאטמאר לאנדאן, זון פון כ"ק אדמו"ר מקיוויאשד זצ"ל, הגה"צ ר' הערשל כהנא שליט"א דיין אין מכון להוראה, זון פון כ"ק אדמו"ר מספינקא אנטווערפן שליט"א, הגה"צ ר' פנחס אליעזר מייזליש שליט"א אבד"ק שאפראן, הגה"צ ר' ברוך בענדיט לויפער שליט"א ר"ם בישיבת סאטמאר ב"פ, און הגה"צ ר' ישראל האגער שליט"א, זון פון כ"ק הרה"צ בעל אור שלום מוויזניץ זצ"ל.
אויך לאזט ער איבער זיינע צוויי ברידער הגה"צ ר' אפרים אהרן שטיין שליט"א אבד"ק שארית ישראל פאלטישאן, און הגה"צ ר' יוסף שלום שטיין שליט"א אבד"ק פאלטישאן בענסענהוירסט. די שוואגערס כ"ק אדמו"ר מהארנסטייפל מילוואקי שליט"א, כ"ק אדמו"ר מצעהלים שליט"א, און הגה"צ ר' יוסף טייטלבוים שליט"א אבד"ק נעפלעמיץ. במשפחת חותנו לאזט ער איבער די שוואגערס כ"ק אדמו"ר מספינקא אנטווערפן שליט"א, הגה"צ ר' יהושע ראזענבערגער שליט"א גאב"ד קרית הרמ"א בית שמש, און הגה"צ ר' יצחק אייזיק כהנא שליט"א דיין אין די עדה החרדית.
צווישן פילע אדמורי"ם ורבנים האט דער פאלטישאנער רב זצ"ל זיך משדך געווען בחיים חיותו מיט כ"ק האדמורי"ם מסאטמאר, תולדות אהרן, קרעטשניף סיגעט, וויזניץ ב"פ, קאשוי, דעעש, מעליץ, סערדאהעלי, צאנז זוועהיל, תולדות צבי ספינקא, משכנות הרועים, ספינקא אנטווערפן, ווערדאן ב"פ, שענדישוב, ראפשיץ, סערט וויזניץ ארה"ב, ביקסאד, קארלסבורג, תולדות מרדכי, לויעוו טשערנאביל, האדאס, דזירקא, חוסט, זלאטשוב, און האחים האדמורי"ם מזידטשויב פון וומס"ב, לאנדאן, זידטשויב חרדים און באלחוב.
