אחינו בני ישראל בארץ הקודש לעבן היינט מיט שווערע שעות, איבערהויפט ארום די שטעט ירושלים, בית שמש, אלעד, און נאך, וואו עס בוזשעווען שרעקליכע וואלד פייערן אויף א ווילדע פארנעם, און שטעלט אין געפאר טויזענטער אידן, נפשות ישראל און זייערע פארמעגן.
די טרוקענע וועטער און די שטארקע היצן, אין באגלייטונג פון ווינטן וואס פארשפרייט פייערן זייער שנעל, האט צוגעברענגט צו עטליכע פייערן ארויסצוגיין פון קאנטראל, און די אפציע אז מענטשליכע הענט פון פארברעכער זאל האבן א שייכות דערצו איז אויך נישט אויסגעשלאסן, און ווייניגסטנס דריי מענטשן זענען שוין ארעסטירט געווארן פארן אונטערצינדן א פייער, אין די צייט וואס די אראבער ימ"ש נוצן אויס די כאאטישע צושטאנד און בעטן פון זייערע שטיצער צו אונטערצינדן נאך פייערן.
אויף שאסיי נומער איינס האט א גרויסע פייער זיך שטארק פארשפרייט, צווינגענדיג טויזענטער מענטשן צו אנטלויפן פון זייערע קארס, אסאך קארס זענען שוין פארברענט געווארן, און א צאל מענטשן זענען שוין געווארן אפגעפירט אין שפיטאל פארן אריינאטעמען צופיל רויעך.
די פייער דעפארטמענט אין מדינת ישראל האט געבעטן הילף פון ארומיגע לענדער, און א מאסיווע קראפט פון פייערלעשער ארבעטן צו איבערקומען די פלאמען, און פארמיידן א ווייטערדיגע פארשפרייטונג, סיי מיטן הילף פון פייערלעשער אויף די ערד, און סיי מיט העליקאפטער און פליגער פון אויבן.
אידישע קינדער איבער די וועלט זענען מתפלל אז עס זאל חלילה נישט שאטן פאר קיין שום אידיש קינד, און די מצב זאל זיך בארואיגן ווי אמשנעלסטן מיטן אויבערשטנס הילף.
