ווידער הערט מען הרחבת גבולי הקדושה נייעס אין שטאט מאנטשעסטער אין ענגלאנד, דאס מאל מיט די וויזניצע קהילה וואס איז אריין געשפרינגען אין א מאסיווע פראיעקט אויפצובויען א שפאגל נייע הערליכע בנין בית המדרש לתורה ולתפילה, אויפן ארט וואו עס איז געשטאנען ביז יעצט די וויזניצע בית המדרש אויף די לעסטער גאס אין די סאלפארד געגנט.
די ביז יעצטיגע בית המדרש איז געווען איינקוואטירט אין א אלטע בנין, און האט געדינט אלס אכסניא פאר די וויזניצע קהילה בערך דרייסיג יאר, אין די לעצטע דריי יאר האט מען פלאנירט דעם בוי פראיעקט וואוסענדיג אז די צאל מתפללים איז שטארק געוואקסן, און מען דארף זעהן צו בויען א נייע שוהל לשם ולתפארת.
אין די יעצטיגע טעג האט מען ענדליך אראפגעווארפן די אלטע געביידע, און אויף צייטווייליג האט מען געבויעט א פראוועזארישע געביידעלע נעבן די שטח הבניה וואו מען וועט דאווענען די קומענדיגע תקופה. די פלאן איז אויפצובויען א גרויסע בנין בית המדרש מיט א היכל פון דריי הונדערט זיץ פלעצער, און איז ערווארטעט אפצוקאסטן פיר מיליאן פונט.
