א שרעקליכע טראגעדיע האט באטראפן היינט די אידישע קהילה אין אנטווערפן, ווען עס האט פאסירט א שוידערליכע אומגליק ווען א ניין יעריג קינד איז ל"ע טראגיש אומגעקומען אין א קאר עקסידענט, נאכן ווערן אראפגעקלאפט דורך א פאליציי קאר זייענדיג אויפן וועג אין חדר אריין צו לערנען די הייליגע תורה.
דאס קינד הילד יהודה אלטר ווייס ע"ה, איז געווען א תלמיד אין כתה ה' אין ת"ת דחסידי בעלזא אין אנטווערפן, א זון פון הרב החסיד ר' נח ווייס הי"ו מחשובי חסידי בעלזא, און א אור אייניקל פון הגה"צ ר' יוסף פאדווא שליט"א ראש הדיינים אין התאחדות קהילות החרדים אין לאנדאן.
דאס קינד איז געווען אונטערוועגנס צו זיין חדר, ווען א פאליציי קאר וואס האט זיך געיאגט צו א עמערזשענסי רוף, האט אים נישט באמערקט אריבערגיין די גאס און אראפגעקלאפט רח"ל. טראץ די פרואוון פון די עמערדזשענסי אגענטורן איז ער ליידער נפטר געווארן אויפן פלאץ, און א העפטיגע אויספארשונג איז געעפנט געווארן אויפן פלאץ.
די עקסידענט האט פאסירט בעפאר צען אזייגער צופרי אויף די פראווינציע שטראסע, ביים ווינקל פון קעטסשטראסע, לויט די באריכטן איז די פאליציי קאר געפארן אויף גאר א שנעלע ספיד, און צוליב א אנדערע קאר וואס האט זיך גערוקט אין די זייט אים צו דורכלאזן, האט דער דרייווער נישט באמערקט דאס קינד אריבערגיין די גאס.
די לוויה וועט פארקומען היינט נאכמיטאג זעקס דרייסיג ארטיגע זייגער, פארנט פון די בנין הקהילה דקהל מחזיקי הדת, דערנאך וועט די לוויה פארקומען ביים ביהמ"ד המרכזי דחסידי בעלזא אין אנטווערפן, אויפן וועג צום בית החיים אין פיטע האלאנד.
