די הונדערטער אידישע איינוואוינער אין ציריך שווייץ זענען גאר פרייליך מיט די פרישע אנטוויקלונג, ווען צום ערשטן מאל ווערט אויפגעבויעט א מהודר'דיגע עירוב ארום די היימישע געגנטער אין ציריך, וואס וועט צוברענגען גרויס הרחבה צו קענען טראגן אויף די לאקאלע גאסן, און קינדער געבענטשטע משפחות וועלן קענען ארומגיין צו די עלטערן און שכנים דורכאויס די לאנגע שבת נאכמיטאג שעות.
די נייע עירוב ווערט געמאכט דורך א בשותפות'דיגע פראיעקט פון די צוויי הויפט קהילות אין שטאט, די חסידישע קהילה "אגודת אחים" אין שפיץ פונעם רב הגה"צ רבי צבי אלימלך פאדווא שליט"א, און די יעקישע קהילה "עדת ישורון" אין שפיץ פונעם רב הרה"ג ר' חיים משה לעווי שליט"א.
די רבני העיר האבן אויסגעארבעט מיט אויסערגעווענליכע מומחים בעניני עירובין אלע דעטאלן, און אין די יעצטיגע טעג טוען די עסקני העיר פאקטיש אויפבויען דעם עירוב וואס וועט לויפן ארום אלע היימישע געגנטער. א ספעציעלע קאמפיין איז געלאזט געווארן אין גאנג צו שאפן די נויטיגע געלטער צו קענען פינאנצירן דעם פראיעקט, און א קול קורא איז ערשינען מיט א הייסע רוף צו שטיצן דעם עירוב, אונטערגעשריבן דורך די גדולי רבני העיר.
