אלפי חסידי צאנז נעמען אויף די שווערע בשורה איבער די פטירה פונעם לאנגיעריגן משמש בקודש, הרב החסיד ר' אייזיק מאיר זאלמענאוויטש ז"ל, וועלכער איז יעצט ביינאכט אין ארץ ישראל נפטר געווארן אין עלטער פון צוויי און זיבעציג יאר, נאך א שווערע קראנקהייט מיט וואס ער האט זיך געמוטשעט די לעצטע פאר יאר ל"ע.
הרב החסיד ר' אייזיק מאיר ז"ל איז געווען א זון פון הגה"צ רבי ישראל ארי' זאלמענאוויטש זצ"ל גאב"ד עכו, וועלכער האט מיט יארן צוריק משמש געווען ברבנות אלס רב אין קרית צאנז נתני', משחר טל ילדותו איז ער אויפגעוואקסן אין די צאנזער מוסדות און זיך מקשר געווען בכל נימי נפשו צו כ"ק אדמו"ר הגה"ק מצאנז קלויזענבורג זי"ע בעל שפע חיים, פון וועמענס הילולא קדישא מען שטייט בלויז דריי טעג אפגערוקט.
מיט איבער פערציג יאר צוריק איז ר' אייזיק מאיר געווארן אויפגענומען אלס פערזענליכע גבאי ביי להבחל"ח כ"ק אדמו"ר מצאנז שליט"א, נאך אין די פריערדיגע יארן ווען דער רבי שליט"א האט געדינט אלס רב אין קרית צאנז נתני', בחיי אביו דער רבי זצ"ל. שפעטער ווען דער רבי איז נתעלה געווארן על כסא האדמורו"ת האט ער ווייטער ממשיך געווען צו משמש זיין בקודש פנימה, און איז לאנגע יארן געווען דער הויפט גבאי און משמש בקודש וואס איז געשטאנען אין שפיץ פונעם רבינ'ס שטוב אין יעדע געלעגנהייט.
ליידער איז ער נישט געזונט געווען די לעצטע תקופה, אין די צייט וואס חסידי צאנז איבער די וועלט זענען פארבעטן געווארן צו דאווענען לרפואתו, כ"ק אדמו"ר מצאנז שליט"א האט אים עטליכע מאל באזוכט אין שפיטאל, און יעצט ביינאכט אין ארץ ישראל איז ער נפטר געווארן לחיי העולם הבא, איבערלאזנדיג א דור ישרים יבורך.
די לוויה קומט פאר מארגן מיטוואך איינס אזייגער מיטאג, ביים ביהמ"ד המרכזי אהל נחמיה אין קרית צאנז נתני', וואו כ"ק אדמו"ר מצאנז שליט"א וועט אויפטרעטן מיט דברי הספד, דערנאך וועט ער קומען לקבורה אויפן בית החיים ותיקין אין נתניה.
