מיט גרויס צער ווערט אויפגענומען יעצט מוצאי שבת די שווערע בשורה, איבער די פריצייטיגע פטירה פון הרה"ג המפורסם ר' אברהם שלמה יאווא זצ"ל אב"ד לעמבערג, וועלכער איז נפטר געווארן אין בליענדן עלטער פון פינף און פופציג יאר, נאך א לענגערע קראנקהייט מיט וואס ער האט זיך ערנסט געמוטשעט רח"ל.
דער רב איז אויפגעוואקסן אין וויליאמסבורג און נתגדל געווארן בין כותלי מוסדות סאטמאר, זייענדיג א פייערדיגער חסיד פון כ"ק אדמו"ר הרה"ק בעל ברך משה מסאטמאר זי"ע, לאנגע יארן האט ער עוסק געווען בהרבצת התורה און אויפגעשטעלט תלמידים, און דאס מערסטע איז ער געווען באקאנט מיט זיינע קלארע און רייכע שיעורים בכל חדרי התורה, וואס טויזענטער אידן איבער די וועלט האבן מיטגעהאלטן דורכ'ן טעלעפאן אדער רעקארדירונגען, זייענדיג א מגיד שיעור מיט א מורא'דיגע געשמאק און פארשטאנד.
אין וויליאמסבורג האט ער אנגעפירט זיין בית המדרש, אויפן וועג וואס ער האט מקבל געווען פון זיין רבי'ן הגאון המפורסם רבי אביגדור מיללער זצ"ל. שפעטער האט ער זיך געצויגן קיין בארא פארק און ווייטער משפיע געווען פאר שומעי לקחו ומעריציו, און היינט איז ער נפטר געווארן נאך א שווערע קראנקהייט רח"ל, איבערלאזנדיג א שיינע משפחה און פילע תלמידים איבער די וועלט.
