א שרעקליכע טרויער האט זיך אראפגעלאזט אויף צענדליגע טויזענטער חסידי חב"ד אומעטום, מיט די פטירה בשיבה טובה פון הגאון החסיד ר' אברהם קארף ז"ל, דער הויפט חב"ד רב אין פלארידע, וועלכער האט משמש געווען ברבנות העכער א יובל יארן כולן שוין לטובה, און איז די נאכט נפטר געווארן אין טיפן עלטער פון צוויי און ניינציג יאר.
דער רב ר' אברהם איז געבוירן געווארן אין שטאט כארקוב, און ביים צווייטן וועלט מלחמה האט ער זיך אויפגעהאלטן צוזאמען מיט זיין משפחה אין סאמערקאנד אוזבעקיסטאן, נאכן קריג איז ער אנגעקומען קיין פראנקרייך וואו ער איז אריין לערנען אין ישיבת תומכי תמימים ליובאוויטש. שפעטער איז ער ארויסגעקומען קיין אמעריקע, אבער עטליכע יאר שפעטער האט דער ליובאוויטשער רבי זצ"ל אים אויסגעקליבן צו פארן קיין ארץ ישראל צו משפיע זיין אויף די יונגע חסידים אין כפר חב"ד.
חודש כסלו תשכ"א האט ער זיך געצויגן קיין מיאמי פלארידע, וואו ער איז אויפגענומען געווארן אלס שליח חב"ד צו פארשפרייטן תורה און חסידות, אין לויף פון איבער זעכציג יאר האט ער אויפגעשטעלט א ריזן אימפעריע פון מוסדות התורה און בתי מדרשים, אויפגענומען ארום פיר הונדערט שליחים אונטער זיין האנט, און אויפגעטון א וועלט פון תורה אין די ארטיגע פלארידע געגנטער.
די לוויה קומט פאר היינט דריי אזייגער נאכמיטאג ביים חב"ד הויפטקוואטיר אויף 770 איסטערן פארקוועי אין קראון הייטס, אויפן וועג צום מאנטיפיורי בית החיים וואו ער וועט קומען לקבורה, סמוך ונראה צום אהל הק' פון אדמור"י בית ליובאוויטש זי"ע.
