די בארימטע אייגנארטיגע ישיבת הדרן אונטער די געניטע פירערשאפט פון די בארימטע מחנכים הר"ר מרדכי מייזעלס שליט"א, הר"ר אהרן דוד פריעד שליט"א, הר"ר שלמה מרדכי ווייס שליט"א, און הר״ר יצחק אלי בוים שליט״א, איז די איינציגסטע ישיבה ומתיבתא וואס ארבעט אויף א קלארע פראפעסיענאלע פארנעם מיט אינאוואציע און שטודירטע מהלכים צו העלפן די ישיבה בחורים גרייכן זייער פולע פאטענציאל.
אויסער די שם טוב וואס 'הדרן' האט זיך קונה געווען מיט די שטארקע חידושים און ספעציעל געלונגענע סדר החינוך אין ישיבה, האט זיך זייער זוממער קעמפ עקסטער קונה שם געווען אלץ א אויסגערופענע קעמפ, וואו בחורים הארעווען און לעבן אויף אלע באקן, זיי זענען דורכאויס די זוממער מסיים א מסכת גמרא יעדע כתה לויט זיינע יכולת, אין צוגאב צו פולע פראגראמען פאר די חשובע בחורי חמד דורכאויס די זוממער וואכן זיי אויסצולערנען לעבנס פעהיגקייטן און סטרוקטור, זיי אוועקצושטעלן מיט יסודות פאר די גאנצע לעבן און זיי צו שענקן די שטארקייט און זעלבסטשטענדיגקייט צו קענען פירן אן אייגענע לעבן על יסוד איתן.
אצינד נאך לאנגע יארן פון ארויסדינגען אנדערע קעמפס, איז געמאלדן געווארן א פרייליכע בשורה פאר אלע ידידי הדרן און פאר גאנץ כלל ישראל, אז די ספעציעלע אויסגערופענע ישיבה ומתיבתא וועט ענדליך קומען אל המנוחה ואל הנחלה, און צום ערשטן מאל האט די הנהלת הישיבה אפגעקויפט אן אייגענעם זוממער קעמפ וואו די בחורים וועלן אינאיינעם פארברענגען און שטייגן דורכאויס די זוממער וואכן און קענען ארויפקומען פאר שבתים וכדו' דורכאויס די יאר.
די נייע שטח איז א הערליכע גיגאנטישע שטח אין די געגנט פון פארקסוויל, ארומגענומען מיט אנדערע קעמפס אין די אומגעגנט, א ברייטע און הערליכע שטח מיט גראונדס און א פאנאראמישע אויסבליק, עס וועט אי"ה דינען לשם ולתפארת פאר די הרבצת התורה און חינוך פון די חשובע בחורים.
העפטיגע פלענער ווערן אין די טעג געמאכט איבער די אויסשטעל און די פולע בנינים וואס וועלן בעז"ה באנייט ווערן אויפן שטח, צו באדינען די חשובע מחנכים, מדריכים, און טייערע בחורי חמד. נכון יהיה בית ה' בראש ההרים.
