אין די יעצטיגע וואכן האט די הנהלה פון חברה קדישא אין קרית וויזניץ בני ברק, אפגעקויפט א פרישע חלקה אין די בית החיים ירקון וואס געפונט זיך אין פתח תקוה נישט ווייט פון בני ברק, וואו מען וועט פארקויפן חלקות פאר וויזניצע חסידים וואס ווילן ליגן צווישן אנשי שלומינו חסידי וויזניץ.
אויסער די וויזניצע בית החיים אין בני ברק וואס איז שוין לאנג אויסגעלאפן פון פלאץ, איז פארהאן נאך א וויזניצע חלקה אויפן הר המנוחות, אבער אויך דארט איז מען שוין כמעט אויסגעלאפן פון חלקות, און כדי צו קענען ווייטער פארקויפן פאר וויזניצע חסידים וואס ווילן זיין פארזיכערט מיט א חלקה לאחר מאה ועשרים אין א חסידישע פלאץ צווישן חסידישע אידן יראי השם, האט די הנהלת החברה קדישא אפגעקויפט אצינד א פרישע חלקה אין בית החיים ירקון, און אצינד קען מען דארט קויפן חלקות געאייגענט פאר די וויזניצע חסידים, אין צוזאמענהאנג מיט די ארטיגע חברה קדישא יראים.
קומענדיגן זונטאג נאכמיטאג ביום צום שבעה עשר בתמוז, וועט פארקומען די מעמד קידוש החלקה אויף נייע חלקה יראים אין בית החיים ירקון, אין שפיץ פון די חברי ורבני החברא קדישא, ראשי ועסקני קהילה קדושה וויזניץ און נאך מענטשן וואס קויפן דארט א חלקה און ווילן מיטהאלטן דעם זעלטענעם מעמד, אין שפיץ פון הרה"ג ר' שמואל בערגער שליט"א רב ביהמ"ד טאלנא בני ברק וועלכער דינט אלס דער רב פון די חברה קדישא.
