שמחת בית קארלין סטאלין – דזיקוב וויזניץ – טעמעשוואר אלעד: עס איז געשלאסן געווארן די שידוך פון א אייניקל ביי כ"ק אדמו"ר מקארלין סטאלין שליט"א, די חתן א זון פון זיין זון הגה"צ ר' יוחנן שוחט שליט"א, איידעם ביי כ"ק אדמו"ר מדזיקוב וויזניץ שליט"א, מיט די כלה א טאכטער פון כ"ק אדמו"ר מטעמעשוואר אלעד שליט"א, איידעם ביי כ"ק אדמו"ר מזוטשקא זצ"ל.
היינט קומט פאר די שמחת התנאים פונעם חתן א זון פון הגה"צ המשפיע ר' נחמן בידערמאן שליט"א מלעלוב, איידעם ביי הגה"צ אבד"ק טשאבא זצ"ל, מיט די כלה א טאכטער פון הגה"צ ר' משה נתן נטע לעמבערגער שליט"א, זון פון הגה"צ אבד"ק מאקאווא אשדוד שליט"א, און איידעם ביי כ"ק אדמו"ר מנדבורנא ירושלים שליט"א. – די שמחה קומט פאר אין זאל עסטרייכער אין בית שמש.
כ"ק אדמו"ר מוויזניץ שליט"א וועלכער האט געוויילט די לעצטע וואך צייט אין ניו יארק אויף א באזוך בקרב חסידיו, לאזט זיך היינט ארויס אויפן וועג צוריק קיין מאלויע שווייץ אויף אפרוה.
כ"ק אדמו"ר מקרעטשניף שליט"א פון י"ם לאזט זיך היינט ארויס אויפן וועג קיין עסטרייך, וואו דער רבי וועט וויילן די קומענדיגע וואך אויף אפרוה אין שטאט סאן אנטאן.
כ"ק אדמו"ר מוויזניץ שליט"א פון בית שמש לאזט זיך היינט ארויס אויפן וועג קיין פוילין, וואו דער רבי וועט וויילן די קומענדיגע צוויי וואכן אויף אפרוה, אין עיר הקודש ליזענסק סמוך ונראה צום ציון הק' פונעם הייליגן רבי'ן ר' אלימלך זי"ע.
היינט נאכט כ"ח תמוז געפאלט די יומא דהילולא קדישא פונעם הייליגן ישמח משה זי"ע, פילע אידן קומען אן צום שטאט אוהעל אין אונגארן צו פוקד זיין דעם ציון הק', א יארצייט סעודה קומט פאר דארט אויפן פלאץ אינעם בנין הכנסת אורחים, די אייניקלעך כ"ק האדמורי"ם שליט"א וועלן אפרעכטן די יארצייט טישן ברוב עם.
היינט כ"ז תמוז געפאלט די אכטע הילולא קדישא פון כ"ק אדמו"ר מצאנז זוועהיל זצ"ל, בן אחיו כ"ק אדמו"ר מזוועהיל ארה"ב שליט"א וועלכער האט געוויילט די לעצטע וואך צייט אין ארץ ישראל לכבוד די יארצייט, וועט היינט פארטאגס פוקד זיין דעם ציון הק' אויפן הר הזיתים, און דערנאך זיך ארויסלאזן אויפן וועג צוריק אהיים קיין ניו יארק. היינט פארנאכטס וועט דער רבי שליט"א אפרעכטן די יארצייט טיש בבית מדרשו אין מאנסי.
גיסו כ"ק אדמו"ר מצאנז זוועהיל שליט"א וועט אפרעכטן די יארצייט טיש היינט פארנאכטס אין ביהמ"ד הגדול אהל שלמה אין מחנה דברי חיים אין קאניאנגא לעיק.
היינט כ"ז תמוז געפאלט די אכצנטע הילולא קדישא פון כ"ק אדמו"ר מסקווירא פלעטבוש זצ"ל, בנו הגדול כ"ק אדמו"ר מסקווירא מאנסי שליט"א וועט ארויפגיין צום ציון הק' אויפן מאנסי בית החיים אינאיינעם מיט די ברידער האדמורי"ם מסקווירא גרינוויל און סקווירא פלעטבוש שליט"א, און שפעטער פארנאכטס אפרעכטן די יארצייט טיש אינאיינעם אין ביהמ"ד סקווירא מאנסי.
היינט קומט פאר א גרויסע עצרת התעוררות אין ביהמ"ד הגדול דקהל יטב לב ד'סאטמאר אין וויליאמסבורג, אין ליכט פון די שרעקליכע גזירה חיטוטי שכבי וואס קומט ליידער פאר אין שטאט יהוד אין ארץ ישראל.
היינט קומט פאר א גרויסע כינוס לעניני שידוכים פאר חסידי באיאן, אין די גאלדען סקיי זאל אין שטאט ביתר, וואו עס וועלן אויפטרעטן הרה"ג ר' הערשל ראבינאוויטש שליט"א ראש ישיבת באיאן, הרה"ג ר' יהושע פינק שליט"א דומ"ץ בעלזא בני ברק, הרב אשר פריזאנד שליט"א משב"ק ביי כ"ק אדמו"ר מבאיאן שליט"א, און הרב יונתן שווארץ הי"ו.
היינט קומט פאר אין מאנטשעסטער א כינוס פאר חסידי צאנז תושבי העיר, לטובת דעם רבינ'ס קרן הצלה צו פינאנצירן די ישיבות און כוללים דחסידי צאנז אין ארץ ישראל, עס קומט פאר אין ביהמ"ד דחסידי צאנז אין מאנטשעסטער, וואו עס וועט אויפטרעטן הגה"צ ר' חיים יוסף בידערמאן שליט"א אב"ד לעלוב ב"ב.
הגה"צ ר' אברהם מרדכי אלתר שליט"א וועלכער איז אנגעקומען צוגאסט קיין ניו יארק צו פראווענען א שבת התאחדות מיט די בחורים פון ישיבת פני מנחם, וועט היינט אויפטרעטן מיט א שיעור בעניני בין המצרים, אין בית החסידים זכרון אברהם אין בארא פארק.
היינט קומט פאר א ערשטמאליגע ביזנעס עקספא פאר טויזענטער ביזנעסלייט חסידי בעלזא בארץ הקודש, אין די גיגאנטישע בניני האומה אין ירושלים.
אריינצושיקן מודעות און נייעס, שיקט אן אימעיל צו NEWS@JDNMAIL.COM
