דאס יהדות החרדית אין ארץ ישראל איז אויפגעשטורעמט אויף א ערנסטע פארנעם, נאך וואס די גראבונגען אויף די מקובל'דיגע בתי חיים אין יהוד גייט ווייטער אן, ווען אין צוגאב איז פארשארפערט געווארן די שרעקליכע גזירת הגיוס, מיטן ארעסט פון דריי בני תורה פארן חטא פון זיך נישט שטעלן אין מיליטער.
נעכטן דינסטאג זענען ארעסטירט געווארן דריי בני תורה וואס האבן פראטעסטירט אין יהוד, און נאך וואס די פאליציי האט אנטדעקט אז זיי האבן באקומען א באפעל זיך צו שטעלן אין מיליטער און האבן דאס נישט אויסגעפירט, האט מען זיי באלד איבערגעגעבן צו די מיליטערישע פאליציי וואס האט זיי אריינגעלייגט אין טורמע, ווייניגסטנס ביז קומענדיגע וואך, אין א פרואוו צו דערדרוקן די לומדי תורה וואס שטעלן זיך נישט צום טריפה'נעם מיליטער.
אין רעאקציע צו די ברוטאלע אויפפירונג איז פאררופן געווארן א רייע שטורמישע פראטעסטן דורך מערערע גדולי הדור, און פון נעכטן ביז יעצט נאכמיטאג אין ארץ ישראל קומט פאר מאסיווע הפגנות אין פילע שטעט, גרויסע גאסן און הייוועיס זענען בלאקירט, ווען די פאליציי פרובירט ווי געווענליך זיך צו שלאגן מיט די מוחים.
