א זעלטן שיינע שבת איז אריבער אינעם קרית מלך רב שיכון סקווירא, ווען עס איז געווען צוגאסט אין שטעטל כ"ק אדמו"ר מסקולען שליט"א פון מאנסי, וואס איז געקומען להסתופף בצל הקודש פון כ"ק אדמו"ר מסקווירא שליט"א אויף האי שבתא דריגלא שבת ראש חודש, זייענדיג דאס ערשטע מאל נאכן איבערנעמען די כתר האדמורו"ת וואס דער רבי האלט מיט א פולער שבת בצל הקודש פונעם סקווירא רבי'ן שליט"א.
דער סקולענער רבי שליט"א האט געהאט די אכסניא אין שטוב פון הנגיד החסיד ר' מרדכי פנחס אסטרייכער הי"ו, זון פונעם סקווירא ראש הקהל הנגיד הנכבד ר' אביגדור אסטרייכער הי"ו. ביותרת הכבוד איז דער רבי מכובד געווארן ביי אלע תפילות און טישן, א שטענדער אויפן אויבן אן ביים דאווענען, און ביי די טישן איז דער רבי געזעסן נאך הגה"צ ר' אהרן מענדיל טווערסקי שליט"א בנו הגדול פון כ"ק אדמו"ר מסקווירא שליט"א.
דאנערשטאג נאכט איז דער סקולענער רבי אריבערגעקומען אויף א באזוך צום סקווירא רבי'ן שליט"א, און איבערגעגעבן א קוויטל און א פדיון לקראת דעם גרויסן שבת, אזוי אויך איז ער ארויף צום ציון הק' פון כ"ק אדמו"ר הרה"ק מסקווירא זי"ע מתפלל צו זיין לישועת הכלל והפרט.
פרייטאג צונאכטס איז דער סקולענער רבי מכובד געווארן צו דאווענען פארן עמוד קבלת שבת, און האט פארגעדאווענט מיט גרויס נעימות אויפן סקולענער שטייגער. ביים טיש פרייטאג צונאכטס איז דער סקולענער רבי מכובד געווארן מיטן בענטשן, און אנצוהייבן די תורות פארן רבי'ן כנהוג. די קינדער פונעם רבי'ן זענען מכובד געווארן מיט ניגונים ביים טיש, און אזוי אויך זענען מכובד געווארן די משמשים בקודש מיט פארשידענע כיבודים.
שבת אינדערפרי איז דער סקולענער רבי מכובד געווארן מיט די עליה פון אחרון - חזק, און מיט גלילה אויפן ערשטן ספר איז מכובד געווארן הרב החסיד ר' בנציון באדנער הי"ו מנאמני ביתו פונעם סקולענער רבי'ן. ביי שלש סעודות איז דער רבי ווידער מכובד געווארן מיט א רייע כיבודים, די זמר דרור יקרא אויף וואס דער רבי האט אנגעהויבן א ווארעמע סקולענער ניגון, הגבהת הכוס צום בענטשן פארן סקווירא רבי'ן, און מיט די הרחמן'ס למוהל.
שבת נאכמיטאג האט דער סקולענער רבי פארגעלערנט א שיעור אין פרקי אבות אינעם ביהמ"ד הגדול אין שיכון סקווירא, וואו דער רבי האט דערציילט לעכטיגע זכרונות און סיפורי צדיקים, און מעורר געווען די תושבי השיכון איבער די געוואלדיגע זכיה וואס זיי האבן להסתופף בצל הקודש אין יעדע געלעגנהייט.
שבת אינדערפרי נאכן דאווענען איז דער רבי ארויף צו קידוש אין שטוב פון הגה"צ ר' אהרן מענדיל טווערסקי שליט"א בנו הגדול פונעם סקווירא רבי'ן, וואו מען האט פארברענגט א לענגערע צייט בדברי תורה וסיפורי צדיקים, דערנאך האט דער רבי געפראוועט די מיטאג טיש אין שטוב פון הנגיד החסיד ר' יום טוב ליפמאן דירנפעלד הי"ו. נאך הבדלה בבית האכסניא, איז דער רבי אריבער אין שטוב פון הרב אליעזר זוסיא לעפקאוויטש הי"ו וואו דער רבי האט געפראוועט די סעודת מלוה מלכה כנהוג עד אור הבוקר, מיטן השתתפות פון הגה"צ ר' אהרן מענדיל טווערסקי שליט"א.
